Məmmədyarov Boltondan Ermənistan rəhbərliyinə hansı sualı verməyi xahiş etdi?

Azərbaycan xarici işlər naziri Elmar Məmmədyarov ABŞ prezidentinin milli təhlükəsizlik məsələləri üzrə müşaviri Con Boltonun Bakıya səfərinə münasibət bildirib.

1news.az-ın məlumatına görə, nazir jurnalistlərə açıqlamasında deyib ki, o, Boltondan Ermənistanın yeni rəhbərlərinə Dağlıq Qarabağ münaqişəsini həll etməyə hazır olub-olmaması barədə sual verməyi xahiş edib:

“Cənab Boltondan xahiş etdim ki, Ermənistanın yeni rəhbərlərinə sual versin ki, Dağlıq Qarabağ münaqişəsini həll etməyə hazırdırlar, ya yox?! Ümumilikdə onlar nə istəyirlər? Azərbaycan və Türkiyə ilə normal münasibətlər yaratmağa, qonşuluq qurmağa hazırdırlarmı?

Təbii ki, əgər hansısa ölkə, o cümlədən Ermənistan rəhbərliyi Azərbaycan və Türkiyə ilə normal qonşuluq siyasəti qurmasa onda onun müstəqilliyi böyük sual altına düşür. Bu, birmənalıdır”.

P.Sultanova