Bakıda "Kəşmirin qara günü" qeyd edilib
Bu gün Bakıda 27 oktyabr "Kəşmirin qara günü"nə həsr edilmiş tədbir keçirilib.
1news.az xəbər verir ki, Pakistanın Azərbaycandakı səfiri Səid Xan Mohmand əvvəlcə Pakistan prezidentinin və baş nazirinin bu gün münasibətilə müraciətlərini səsləndirib.
Said Xan Mohmand bildirib ki, 27 oktyabr 1947-ci il insanlıq tarixinin ən qara günlərindən biridir. Belə ki, düz 71 il əvvəl məhz bu gün Hindistan ordusu Cammu və Kəşmirə daxil olaraq bu regionu işğal edib. Səfir bildirib ki, BMT Təhülkəsizlik Şurasının qətnamələrinə baxmayaraq, Hindistan ordusu regionu tərk etmir.
Səfir deyib ki, Azərbaycan bu məsələdə hər zaman Pakistana dəstək verib. Eyni zamanda Pakistan da Qarabağ münaqişəsində hər zaman Azərbaycanın yanında olub: "Dağlıq Qarabağ da Hindistan qoşunlarının Kəşmiri işğal etdikləri kimi Ermənistan tərəfindən işğal olunub. Dağlıq Qarabağın işğalı nəticəsində Azərbaycanın bir milyon qaçqını olduğu kimi, Hindistanın işğalı nəticəsində Kəşmir bölgəsindən milyonlarla insan öz doğma torpaqlarından didərgin düşüb”.
Diplomat əlavə edib ki, Hindistan BMT Təhlükəsuzlik Şurasının qətnamələrinə hörmətlə yanaşmalı və onların həyata keçirilməsinə öz töhfəsini verməlidir. Pakistan Cammu və Kəşmir vilayətlərinin öz müqəddaratını təyin edənədək bu regiona yardım edəcək".
P.Sultanova
