Qriqoryanı həbsdən azad edən hakim təhdid olunur

Ermənistanın ombudsmanı Arman Tatoyan sosial şəbəkələrdə general Manvel Qriqoryan barədə həbs qətimkan tədbirinin dəyişdirilməsi barədə qərar qəbul etmiş hakim  David Balayana qarşı səslənən nifrət, təhqir, hətta təhdid, zorakılıq çağırışlarından narahatlığını ifadə edib.

1news.az erməni mətbuatına istinadla xəbər verir ki, ombudsman Qriqoryanın vəkilləri və adıçəkilən şəxslərin ailə üzvlərinə qarşı təhdidlərdən də narahatlığını açıqlayıb.

Tatoyan xatırladıb ki, Ermənistan konstitusiyasına əsasən, hər hansı bir cinayət işi ədalət məhkəməsinin, hakimlərin tam müstəqilliyini tələb edir.

Qeyd edək ki, İrəvan məhkəməsi dekabrın 21-də Qriqoryanın 25 milyon dram (təxminən 51,5 min dollar) girov müqabilində azadlığa çıxması barədə qərar verib.

Bundan dərhal sonra Eçmiədzində etiraz aksiyaları başlayıb, onun yenidən həbsi tələb olunub. Aksiyalar İrəvanda da davam etdirilib.

Dekabrın 24-də isə Ermənistan Baş Prokurorluğu qərara etiraz edib. Vəkilləri Qriqoryanın ağır xəstə olduğunu bildirirlər.

Qriqoryan deputat toxunulmazlığı ləğv edildikdən sonra həbs edilib.O, qanunsuz silah saxlamaqda, başqasının əmlakını ələ keçirməkdə, hərbçilər üçün nəzərdə tutulmuş ərzağın mənimsənilməsində ittiham olunur.

P.Sultanova