Alaverdiyan: Yeqiazaryanın ölümü Ermənistanın üzərinə kölgə salır

"Haynews-in" saytına məsul olan Mqer Yeqiazaryanın ölümü şübhəsiz ki, bir sıra insan hüquqları təşkilatlarının məruzələrində əks olunacaq və Ermənistanın reytinqinə təsir göstərəcək.

1news.az erməni mətbuatına istinadla xəbər verir ki, bunu Ermənistanın birinci ombudsmanı, hüquq müdafiəçisi Larisa Alaverdiyan deyib.

O, hadisə ilə bağlı  “The Washington Post" da dərc edilən məqaləyə diqqət çəkərək deyib ki, bu yalnız birinci reaksiyadır. Yeqiazaryanın ölümü bu il insan hüquqları və söz azadlığı haqqında hesabatların hazırlanması zamanı mütləq nəzərə alınacaqdır.

Alaverdiyan bu hadisənin 3-4 hesabatda qeyd ediləcəyini istisna etməyib. O, hüquq-mühafizə orqanlarına və digər güc strukturlarına ünvanlanmış tənqidlərin konkret şəxslərə yönəlmədiyini vurğulayıb:

"Yeqizaryanın məsələsində konkret bir şəxsin ölümü var. Ermənistana qarşı dost olmayan ölkələr bu vəziyyətdən istifadə edərək hadisəni insan haqları məsələsi kimi beynəlxalq təşkilatların gündəminə gətirə bilərlər.

Mqer Yeqiazaryanın ölümü ilə bağlı vəziyyət ölkəmizin demokratiya yoluna bir kölgə salır.  Ermənistanın ləyaqətindən daha vacib bir şey varmı? Hərəkət etməzdən əvvəl bunu nəzərə almaq lazımdır".

Xatırladaq ki, yanvarın 26-da “Haynews” saytının rəhbərliyində təmsil olunan, həmçinin "Erməni qartalları: Vahid Ermənistan" partiyasının sədr müavini həbsdə keçirdiyi 44 günlük aclıq aksiyasından sonra ölüb.

P.Sultanova