KTMT baş katibinin təyin olunması yenidən gündəmə gətirilir
KTMT-də baş katib təyin edilməsi məsələsi 2-3 aydan sonra yenidən gündəliyə daxil olacaq.
1news.az xəbər verir ki, bu barədə Ermənistanın "Hraparak" nəşri yazıb.
Məlumatda xatırladılır ki, İrəvanla Minsk arasında baş katibinin təyin olunması məsələsində fikir ayrılığı yaranıb. Müzakirə Ermənistanın nümayəndəsi Yuri Xaçaturovun baş katib vəzifəsindən geri çağırılmasından sonra başlayıb.
Ermənistan bu mövqeyini 2020-ci ilə qədər saxlamaqda israr edir. Eyni zamanda, Belarus bu vəzifəyə öz namizədini - Təhlükəsizlik Şurasının katibi Stanislav Zasyanı təklif edir.
Qəzet yazıb ki, Zasyanın baş katib vəzifəsinə namizədliyi prezident Aleksandr Lukaşenkonun piar aksiyası idi.
Belarus prezidenti bu məsələni 2018-ci ilin sonunadək həll etməyə söz verib, lakin indiyədək mövzu yüksək dairələrdə müzakirə olunur.
Nəşrin iddiasına görə, Bu il Belarusda parlament və prezident seçkiləri keçiriləcəyi üçün Lukaşenko Rusiya ilə əlaqələrin pisləşməsindən çəkinərək KTMT baş katibinin təyin edilməsi məsələsində ehtiyatlı davranır.
P.Sultanova
