Malili nazirdən BMT-yə çağırış: terrorçular mədəni abidələri də hədəfə alıblar

UNESCO-nun Dünya İrs Komitəsinin 43-cü sessiyası çərçivəsində Mali Respublikasında törədilən terror hücumları barədə müzakirə aparılıb.
1news.az xəbər verir ki, əvvəlcə terror hücumları nəticəsində həlak olanların xatirəsi bir dəqiqəlik sükutla yad edilib. Mali Respublikasının mədəniyyət naziri Ndaye Ramatoulaye Diallo bildirib ki, dünən terrorçular Malidə hücumları daha da genişləndiriblər. O, bu zaman mədəni abidələrin də hədəfə alındığını bildirib:
“Mən Mali hökuməti adından BMT Təhlükəsizlik Şurasını təcili iclas keçirməyə və bu hadisələrə qiymət verməyə çağırıram. Mən həmçinin, BMT-ni özünün sülhməramlı qüvvələrinin Malidəki mandatını daha da genişləndirməyə səsləyirəm. Biz sizə çağırış edirik ki, yerli əhali ilə yanaşı bizim tarixi irsimiz olan Bacanqara qayalıqlarını terror hücumlarından qoruyasınız. Biz xüsusilə Afrika ölkələrini Mali prezidenti İbrahim Boubacar Keitanın rəhbərliyi altında Maliyə dəstək verməyə çağırıram. Bizə dəstək olun. Malidə baş verənlər Dünya İrs Komitəsinə dərs olmalıdır”.
Mali naziri həmçinin, Tinbuktu məqbərəsinin dağıdılmasının qarşısını almaqda da Dünya İrs Komitəsindən dəstək istəyib:
“Afrikanın mədəni irsi olan bu abidə bilərəkdən dağıdılır. Bu bizim mədəni irsimizdir. Mən Mali prezidenti adından bizə dəstək olmağa çağırıram. Bəşəriyyətin ayrılmaz hissəsi olan bu sərvətimiz qorunmalıdır. Biz Afrikada hər zaman mədəni irsin qorunmasının ön cəbhəsində gedirik. Mədəni dünyanı həmrəyliyə səsləyirik”.
Nazir Malinin terrorçular qarşısında əyilməyəcəyini vurğulayıb: “Biz əyilməyəcəyik və dağıdılmış mədəni irsimizi bərpa edəcəyik. Biz hücumlardan asılı olmayaraq məkrli düşmən üzərində zəfər çalacağımıza əminik”.
P.Sultanova