İlham Əliyev: Biz ədalət istəyirik, Azərbaycana eyni şərtlərlə, eyni həcmdə vəsaitin verilməsini istəyirik
Avropa İttifaqının Ermənistana 2,6 milyard dollar, Azərbaycana isə 140 milyon avro ayırması bir çox müşahidəçiləri təəccübləndirən fakt oldu. Yəni, fərq təqribən 20 dəfədir.
1news.az-ın AZƏRTAC-a istinadla verdiyi xəbərə görə, bu barədə Prezident İlham Əliyev Brüsseldə İtaliyanın “İl Sole 24 Ore” qəzetinə müsahibəsində müvafiq suala cavabında bildirib.
Dövlətimizin başçısı qeyd edib ki, bu, ədalətli deyil, hər iki ölkənin real ehtiyaclarına müvafiq deyil.
“Hətta azad olunmuş ərazilərdə Ermənistan tərəfindən törədilmiş dəhşətli dağıntıları kənara qoysaq belə, hər iki ölkənin əhalisinin sayına nəzər salsaq, görərik ki, fərq 5 dəfədən çoxdur – Azərbaycanın əhalisi 10 milyon, Ermənistanda isə 2 milyon. Bundan əlavə, işğal illəri ərzində Livanın sahəsinə bərabər ərazilər tamamilə dağıdılıb. Bu gün əcnəbi vətəndaşlar və jurnalistlər həmin ərazilərə səfər edəndə dağıntıların miqyasını öz gözləri ilə görürlər”, - deyə Prezident İlham Əliyev bildirib.
Hesablamalara görə orada 1 milyona yaxın mina basdırıldığını diqqətə çatdıran Azərbaycan Prezidenti deyib: “Minaları təmizləmə prosesi olduqca baha başa gəlir və çox vaxt aparır. Ermənistanda heç bir dağıntı yoxdur. Bu ölkə işğal edilməmişdi, o, özü işğalçı idi. Fiziki cəhətdən belə Ermənistanın iqtisadiyyatı bu nəhəng həcmli paketi mənimsəyə bilməz. Beləliklə, bu, çox təəccüblüdür və bu paket elan edildikdən sonra, Prezident Mişelin bu yay Azərbaycana səfərindən sonra biz bu mövzunu daim müzakirə edirik. Biz istəyirik ki, yanaşma vahid standartlara əsaslansın. Biz ədalət istəyirik və əlbəttə, Azərbaycana eyni şərtlərlə, eyni həcmdə vəsaitin verilməsini istəyirik”.
