Yeniyetmə cüdoçuların Azərbaycan birinciliyinə start verildi - FOTO
14 yanvar 2022-ci ildə Bakıda cüdo idman növü üzrə U-18 qız və oğlan yeniyetmələr arasında Azərbaycan birinciliyi start götürdü.
Hövsan qəsəbəsində yerləşən Fövqəladə Hallar Nazirliyinin (FHN) İdman Sağlamlıq Mərkəzində keçirilən yarış Azərbaycan Cüdo Federasiyası və Azərbaycan Respublikası Gənclər və İdman Nazirliyinin birgə təşkilatçılığı ilə baş tutur. Qeyd olunan yarışda ölkənin müxtəlif rayon və şəhərlərindən olan 76 klub, cəmiyyət və idman təşkilatlarından 570-ə yaxın (479 oğlan, 89 qız) idmançı mübarizə aparır.
Qeyd edək ki, yarışın əsas məqsədi Azərbaycanda cüdonun coğrafiyasını genişləndirmək, yeniyetmələr arasında idmanın kütləvi təbliğinə və təşviqinə nail olmaq, eyni zamanda perspektivli namizədləri milli yığma komandaya seçməkdir.
