“Kənd Təsərrüfatı Nazirliyi pandemiyanın təsirlərini zəiflətmək üçün böyük işlər görür” – Tural İsmayılov
“Pandemiyanın iqtisadi təsirlərini zəiflətmək və qeyri-neft sektorunun inkişafı üçün KTN tərəfindən genişmiqyaslı işlər həyata keçirilir”.
1news.az xəbər verir ki, bu fikirləri saytımıza açıqlamasında Sosial Tədqiqatlar Mərkəzinin baş məsləhətçisi, politoloq Tural İsmayılov bildirib:
“Cənab Prezident ölkədə qeyri-neft sektorunun inkişafı üçün mühüm tapşırıqlar verib. Son illərdə özəlliklə aqrar sahədə dövlət başçısının qayğısı nəticəsində ciddi işlər aparılır. Prezident İlham Əliyevin müvafiq Fərmanına əsasən aqrar sektorda şəffaflığın, hesabatlılığın və operativliyin təmin edilməsi məqsədilə Elektron Kənd Təsərrüfatı İnformasiya Sistemi (EKTİS) yaradılıb. Bunun nəticəsində xeyli fermerlərimiz bu proqramdan yararlana biliblər. EKTİS sisteminin tətbiqinə Vətəndaşlara Xidmət və Sosial İnnovasiyalar üzrə Dövlət Agentliyi də dəstək verir. Fermerlər DAİM-lərə və ASAN Xidmət mərkəzlərində yaradılmış xüsusi xidmət pəncərələrinə yaxınlaşaraq EKTİS-in tətbiqi ilə bağlı məsləhət ala bilirlər.
Ölkəmiz fermerlərə göstərilən dövlət qayğısına görə də bir çox dünya ölkələrinə örnək göstərilə bilər. Ölkəmizdə kənd təsərrüfatının inkişafına yönəlmiş daha bir mühüm addım aqrar sığorta sisteminin tətbiqidir. Prezident İlham Əliyevin “Aqrar sığorta haqqında” Azərbaycan Respublikası Qanununun və “Aqrar sığorta haqqında” Azərbaycan Respublikasının 2019-cu il 27 iyun tarixli 1617-VQ nömrəli Qanununun tətbiqi və Aqrar Sığorta Fondunun yaradılması barədə” Fərmanının icrası ilə əlaqədar dünyadakı mövcud aqrar sığorta modelləri araşdırılıb.Həmin modellərin üstün və zəif cəhətləri araşdırılaraq Azərbaycan üçün dövlət-özəl sektor tərəfdaşlığını əsas tutan model hazırlanıb. Həmin modelə əsasən Aqrar Sığorta Fondu yaradılıb və aqrar sığorta mexanizminin tətbiqi təmin olunub. Hazırda işğaldan azad olunan bölgələrimizin önəmli aqrar potensialı var. KTN tərəfindən orada ciddi layihələr həyata keçiriləcək”.
Ekspert onu da bildirib ki, aqrar sahədə maarifləndirmədə vətəndaşlarımız da fəal iştirak etməlidirlər.
1news.az
