Ermənilərin məhv etdiyi “Xaçınçay” Su Anbarını sahibləri bərpa edir - Sədr müavini yekunlaşacağı tarixi açıqladı - FOTO
Azərbaycan Meliorasiya və Su Təsərrüfatı Açıq Səhmdar Cəmiyyətinin təşkilatçılığı ilə
Ağdam rayonundakı "Xaçınçay" Su Anbarında, Tərtər rayonu "Suqovuşan" su anbarının 5.2 km uzunluğundakı magistral kanal və "Tər-tər" sol sahil magistral kanallarda görülən təmir-bərpa işləri ilə bağlı məlumat vermək üçün mediatur təşkil edilib.
1news.az-ın əməkdaşlarının da iştirak etdiyi mediatur çərçivəsində ilk dayanacaq Ağdam rayonunda yerləşən "Xaçınçay" Su Anbarı olur.
Azərbaycan Meliorasiya və Su Təsərrüfatı Açıq Səhmdar Cəmiyyətinin sədr müavini Rafiq Aslanov deyib ki, "Xaçınçay" Su Anbarı 1964-cü ildə Xaçınçayın üzərində inşa edilib.
“Xaçınçay özü Azərbaycan ərazisində formalaşır, mənbəyi dəniz səviyyəsindən təqribən 1800 metr yüksəklikdə yerləşir. Mənbəyi bulaq suları, yeraltı sular və yağış sularıdır. "Xaçınçay" Su Anbarı inşa edilməklə Ağdam rayonunun 7 min hektar əkin sahəsin suvarma ilə təmin edib. Son 30 ildə mənfur qonşularımız tərəfindən bir sıra ərazilərimiz işğala məruz qalmışdı, o cümlədən "Xaçınçay" Su Anbarının ərazisi işğala məruz qalmışdı. 2020-ci ildə Vətən Müharibəsi zamanı torpaqlarımız işğaldan azad edildikdən sonra cənab Prezidentin sərəncamı ilə Dövlət Su Komissiyası yaradılıb. Dövlət Komissiyasının sədri və üzvləri dəfələrlə burada olub.
Buraya baxış keçirəndə işğal dövründə buranın necə bərbad vəziyyətdə olduğunun şahidi olduq. Su anbarı demək olar ki, məhv edilmişdi. Eyni zamanda bəndin özü də qəzalı vəziyyətdə idi. Bununla bağlı Komissiya iclaslar keçirdi, təcili olaraq tədbirlər keçirilməyə başlandı".
"İlk növbədə ərazi aidiyyəti qurumlar tərəfindən minadan təmizləndi” - deyə, sədr müavini əlavə edib:
“Mina təmizlənəndən sonra burada iqtisadi-texniki əsaslandırma və layihə-smeta sənədlərinin hazırlanması tapşırıldı. Bununla bağlı müsabiqə elan olundu və qalib elan olunandan sonra işlərə başlanıldı. Müsabiqənin qalibi “Körpü-Bina Tikinti” şirkəti oldu”.
R.Aslanov bildirib ki, şirkət tərəfindən 2 ay öncə işə başlanılıb.
“Burada təkcə bəndin yamacı, beton hissəsi 80 min kvadrat metrə yaxındır. O da beton tamamilə aşınmışdı, aşınan hissələri 80 min kvadrat metr sahədə beton, dəmir hisssəsi sökülüb, daşınıb. Artıq 80 faizə qədər təmir-bərpa işləri yekunlaşıb. Beton təxminən 20-30 santimetr qalınlığında olub.
Bəndin yamacında görülən işlərlə yanaşı, eyni zamanda suqəbuledici qüllə özü pis vəziyyətdə idi, qapılar mənfur qonşular tərəfindən sökülüb aparılmışdı. Qapıların, suqəbuledici qüllənin, estakadanın bərpası işləri aparılır. Bunlarla yanaşı qəza su tullayıcısında da bərpa işləri gedir, magistral kanalın 7 kilometr hissəsində su buraxma qabiliyyəti 3,2 kubmetr saniyə təşkir edir, orada da betonlama işlərinə başlanılıb. Nəzərdə tuturuq ki, bu işlə gələn ilin oktyabrına qədər tamamilə yekunlaşsın, suyun yığılmasını təmin edək və 2024-cü üçün ilin payız suvarmasını bu anbar vasitəsilə həyata keçirək. Bununla bağlı ikinövbəli iş rejimi tətbiq edilir”.
Foto: Nadir İbrahimli
