İl ərzində yol hərəkəti qaydalarını pozmayan sürücülər qiymətli hədiyələrlə mükafatlandırılıblar

Ümummilli Lider Heydər Əliyevin 100 illik yubileyinə həsr olunmuş “Nümunəvi sürücülər” müsabiqəsi ilə əlaqədar olaraq il ərzində yol hərəkəti qaydalarını pozmayan sürücülər müəyyənləşdirilərək Baş Dövlət Yol Polisi (DYP) İdarəsi tərəfindən qiymətli hədiyələrlə mükafatlandırılıblar.

İdarədən 1news.az-a verilən məlumata görə, məqsəd sürücüləri qayda pozmamağa təşviq etmək və yollarda insanların təhlükəsizliyini təmin etməkdir.

Yollarda təhlükəsizliyin təmin olunmasının əsas tələblərindən biri də nəqliyyat vasitələrinin saz vəziyyətdə istismar edilməsidir. Bununla əlaqədar olaraq artıq bir neçə müddətdir nəqliyyat vasitələrinin sahiblərinə fasiləsiz və daha keyfiyyətli xidmət göstərilməsi, eləcə də vətəndaş məmnunluğunun təmin edilməsi məqsədilə, Baş DYP İdarəsinin paytaxtın Sabunçu rayonunun Zabrat qəsəbəsində və Lökbatan dairəsindən Yeni Yasamal yaşayış massivinə gedən yolun üzərindəki Texniki Müayinə Mərkəzlərində 24 saat fasiləsiz iş rejimi tətbiq edilib.

Bununla da nəqliyyat vasitələrinin sahibləri və sürücüləri növbəlilik prinsipi əsasında fəaliyyət göstərən Müayinə Mərkəzlərinə günün istənilən vaxtı müraciət etmək imkanı qazanıblar.