Monteneqroda silahlı insident olub, ölənlər var

Monteneqronun cənubunda yerləşən Çetinye şəhərində silahlı insident baş verib.

1news.az xəbər verir ki, insident nəticəsində azı 7 nəfər həlak olub.

Təhlükəsizlik qüvvələrinin verdiyi məlumata əsasən, 45 yaşlı bir kişi şəhərin Bayitse bölgəsində yerləşən əyləncə məkanında odlu silahdan istifadə edərək bir neçə nəfəri qətlə yetirib. Daha sonra o, binanı silahlı şəkildə tərk edib və hadisə yerindən uzaqlaşıb. Hadisə nəticəsində iki azyaşlı olmaqla 7 nəfər ölüb, 4 nəfər isə ağır yaralanıb.

Hazırda həmin şəxsin axtarışları davam etdirilir. Polis ictimaiyyəti sakit olmağa və mümkün qədər evdə qalmağa çağırıb.

İlkin məlumatlara görə, insidentin səbəbi silahlı şəxsin əyləncə məkanının sahibi ilə şəxsi mübahisəsi olub.