Daşınmaz əmlakın satışı ilə bağlı Vergi Məcəlləsinə dəyişiklik edildi
Vergi Məcəlləsinin 218-ci maddəsinə edilmiş dəyişikliklərə əsasən mülkiyyətində olan yaşayış və qeyri-yaşayış sahələrini təqdim edən şəxslər 1 yanvar 2016-cı ildən etibarən notarius tərəfindən ödəmə mənbəyində sadələşdirilmiş vergiyə cəlb olunur.
Bu haqda 1news.az Vergilər Nazirliyinə istinadla xəbər verir ki, aşağıdakı hallarda yaşayış və qeyri-yaşayış sahələrinin təqdim edilməsindən vergi tutulmur:
• fiziki şəxsin azı 5 il ərzində yaşayış yeri üzrə qeydiyyatda olduğu yaşayış sahələrinin təqdim edilməsi,
• daşınmaz əmlakın hədiyyə, maddi yardım və miras formasında ailə üzvləri tərəfindən verilməsi,
• daşınmaz əmlakın dövlət ehtiyacları üçün alınması,
• əmlakın ər və arvad arasında verilməsi, keçmiş ər-arvad arasında boşanma prosesində verilməsi.
Vergi yaşayış və qeyri-yaşayış sahələrinin hər kvadratmetri üçün 15 manat olmaqla aşağıda göstərilən qaydada hesablanır:
VM= S x ZƏ x 15 manat
VM – ödənəcək verginin məbləği
S – daşınmaz əmlakın sahəsi (m²-lə) ZƏ - Nazirlər Kabineti tərəfindən müəyyən edilmiş zona əmsalı
Qeyri-yaşayış sahələrinin təqdim edilməsi zamanı isə vergi məbləği əlavə 1,5 əmsal tətbiq edilməklə hesablanır:
VM = S x ZƏ x 15 manat x 1.5
1.5 – qeyri-yaşayış sahələri üçün tətbiq olunan əmsal ----------------
Misal 1: Qurbanov Fərid “İçərişəhər” metro stansiyasının (Zona 1) yaxınlığında yerləşən və sahəsi 100 m2 olan mənzildə 3 il yaşayış yeri üzrə qeydiyyatdadır. Həmin mənzilin satışı zamanı sadələşdirilmiş vergi məbləği aşağıdakı kimi hesablanır:
100 m2 x 15 manat x 4 = 6000 manat
Misal 2: Tural Sultanovun mülkiyyətində 6-cı zonada sahəsi 300 m2 qeyri-yaşayış sahəsi - zirzəmi var. Həmin zirzəmi təqdim etdiyi zaman sadələşdirilmiş vergi məbləği aşağıdakı kimi hesablanır:
300 m2 x 15 manat x 1,8 x 1.5 = 12150 manat
Misal 3: Fiziki şəxs mülkiyyətində olan və Bakı şəhəri üzrə 2-ci zonada (3,0 əmsal) yerləşən 100 kvadrat metr sahəsi olan mənzilini və 3-cü zonada (2,2 əmsal) yerləşən 150 m2 sahəsi olan ticarət obyektini təqdim etmişdir. Alqı-satqı əməliyyatlarını rəsmiləşdirən notariuslar tərəfindən ödəmə mənbəyində tutulan sadələşdirilmiş vergi aşağıdakı kimi hesablanır:
Mənzilin satışı üzrə: 100 m2 x 15 man. x 3 zona əmsalı =4.500 manat;
Ticarət obyektinin satışı üzrə: 150 m2 x 15 man. x 2,2 zona əmsalı x 1.5 əmsal =7.425 manat.
Cəmi ödənilməli vergi: 11.925 manat.
Yaşayış və qeyri-yaşayış sahələrinin təqdim edilməsi üzrə sadələşdirilmiş vergi alqı-satqı müqavilələrini təsdiq edən notarius tərəfindən hesablanaraq tutulur, 1 (bir) bank günü ərzində dövlət büdcəsinə ödənilir və bu barədə “Yaşayış və qeyri-yaşayış sahələrini təqdim edən şəxslərdən notariuslar tərəfindən ödəmə mənbəyində tutulan sadələşdirilmiş verginin bəyannaməsi” hesbat ayından sonrakı ayın 20-dən gec olmayaraq vergi orqanına təqdim edilir.
1news.az
