Deputat: ““Milli Şura”nın “fədakar”ları Azərbaycan əleyhdarlarının sifarişlərini yerinə yetirir”
Son zamanlar özlərini Demokratik Qüvvələrin Milli Şurası adlandıran qurumun videokonfranslarından görüntülər yayılır.
Buna konfrans demək belə düzgün deyil, aparılan müzakirələri qeybətdən başqa bir şey adlandırmaq olmaz. Milli Şuranın son videokonfransından yayılan görüntülərdə açıq şəkildə bildirilir ki, bu qurumun əsas vəzifəsi Azərbaycan hakimiyyətini şərləməkdir. Bu etiraf onların əsl simasını və xislətini aydın nümayiş etdirir. Müşahidələr onu göstərir ki, “Milli Şura” “Azərbaycana nə qədər pisdirsə, bizə o qədər yaxşıdır” prinsipi ilə addım atır. Bəs görəsən onların belə etməkdə məqsədi nədir?
Məsələ ilə bağlı 1news.az-a danışan Milli Məclisin deputatı Naqif Həmzəyev deyib ki, “Mili Şura” adlı qurumun yarandığı gündən bir məqsədi olub: gündən-günə inkişaf edən ölkəmizin beynəlxalq aləmdə möhkəmlənən mövqeyinə, iqtisadi qüdrətinə kölgə salmaq, müstəqil Azərbaycanın nüfuzuna xələl gətirmək.
““Milli Şura”nın son videokonfransından yayılan görüntüləri bu qurumun əsas vəzifəsinin Azərbaycan hakimiyyətini şərləmək, gözdən salmaq olduğunu sübut etdi. Məhvə məhkum olan qurumun fəallarının etirafı onların əsl simasını bir daha nümayiş etdirdi. Eyni zamanda öz dilləri ilə “Milli şura”nın məhvinin labüdlüyünü təsdiq etdi.
Təbii ki, düşmənin dəyirmanına su tökənlərin videokonfransda öz dilləri ilə əməllərini etiraf etməsi heç də gözlənilməz olmadı. İllərdir onların ölkəmiz haqqındakı şər-böhtanları, faktları və rəqəmləri təhrif etmələri cəmiyyətimizdə ikrah hissi yaradırdı. Yaxşını pisdən ayırmağı bacaran xalqımız yaxşı bilirdi ki, “Milli Şura”nın “fədakar”ları erməni lobbisinin və xaricdəki Azərbaycan əleyhdarlarının sifarişlərini yerinə yetirirdilər”.
Qafar Ağayev
