ru

Cəmiyyət

27 Mart saat 13:53

Kamran Əliyev: “İstənilən nəqliyyat vasitəsi ilə rayon və şəhərlərarası sərnişindaşıma qadağandır”

Kamran Əliyev: “İstənilən nəqliyyat vasitəsi ilə rayon və şəhərlərarası sərnişindaşıma qadağandır”

“Operativ Qərargahın qəbul etdiyi qərarda göstərilir ki, ölkə üzrə rayon və şəhərlərarası sərnişin daşıma fəaliyyəti qadağan olunsun. Bu o demək deyil ki, kimsə kiçik tutumlu maşınlarda sərnişin daşımalıdır. İstənilən nəqliyyat vasitəsi ilə rayon və şəhərlərarası sərnişindaşıma fəaliyyəti qadağan olunub”.

Bu 1news.az-a açıqlamasında Baş Dövlət Yol Polisi İdarəsinin (BDYPİ) İctimaiyyətlə əlaqələr şöbəsinin rəisi, polis polkovniki Kamran Əliyev deyib. O bildirib ki, bu tədbirin əsas məqədi insanların bir-biri ilə təmasının azaldılması, hamının olduğu yerdə qalması ilə bağlıdır.

“Bu işdə mətbuatın da üzərinə böyük yük düşür. Vətəndaşlara yalnız polis müraciət etməməlidir, mətbuat nümayəndələri də bu çağırışlara dəstək verməlidir ki, insanlar olduqları yerdən çıxmasın, qaydalara riayət etsin”.

K.Əliyev deyib ki, 11 mindən çox nəqliyyat vasitəsi postlardan geri qaytarılıb.

“19 mart- İlk məhdudlaşdırma tətbiq edilən vaxtdan indiyə qədər bölgələrdən gələn 7545 nəqliyyat vasitəsi postlardan geri qaytarılıb. 24 martdan isə Bakıdan çıxmaq istəyən 3656 nəqliyyat vasitəsinin qarşısı alınıb”.

Xatırladaq ki, Dünyada yayılmış koronavirus (COVİD-19) pandemiyası ilə mübarizədə müxtəlif ölkələrin təcrübəsini nəzərə alaraq, əhalinin sağlamlığının qorunmasını ali məqsəd kimi qəbul edərək, koronavirus infeksiyasının ölkədə yayılmasının, onun törədə biləcəyi fəsadların qarşısının alınması məqsədilə Azərbaycan Respublikasının Sanitariya-epidemioloji salamatlıq haqqında Qanununun 25-ci maddəsinə əsasən Azərbaycan Respublikasında 24 mart 2020-ci il saat 00:00-dan etibarən 20 aprel saat 00:00-dək xüsusi karantin rejimi elan edilib.

Karantin qaydalarının 3-cü bəndində qeyd olunur ki, Mülkiyyət növündən asılı olmayaraq, ölkə üzrə rayon və şəhərlərarası sərnişindaşıma fəaliyyəti dayandırılsın.

Qafar Ağayev

 

BÖLMƏDƏ YENİ

yuxarı
Materiallardan istifadə edərkən sayta mütləq istinad olunmalıdır.

© Copyright 2007-2020 "The First News", İnformasiya Agentliyi
Bütün hüquqlar qorunur