“MFL Carlsberg Biznes Liqası”na start verildi: ilk oyunların NƏTİCƏLƏRİ – FOTO – VİDEO
Azərbaycanın futbol üzrə ən böyük həvəskarlar liqası olan MFL tərəfindən ölkəmizdə fəaliyyət göstərən şirkətlər arasında keçirilən “MFL Carlsberg Biznes Liqası”nın I turunun oyunları keçirilib.
1news.az-ın verdiyi xəbərə görə, həm A, həm də B qruplarında çıxış edən komandalar arasında “MFL Arena”nın meydanlarında keçirilən görüşlərin əksəriyyəti gərgin mübarizə şəraitində keçib.
Qeyd edək ki, ilk turda A qrupunun və bütünlüklə ilk turun ən qollu qarşılaşması “Universal” və “Katsan Group” komandaları arasında keçirilən görüşdə qeydə alınıb – 14 qol. Rəqibinə 9:5 hesabı ilə qalib gələn birincilər meydanı üç xalla tərk ediblər.
“Soliton LTD”nin rəqibinin qapısından 7 top keçirdiyi digər görüşdə JTİ-nin gücü yalnız təsəlli qoluna çatıb. “Expressbank” – METAK, “Avromed” – “Gilan Tekstil Park” matçlarında isə qapılara qol vurulmayıb.
B qrupunun ən qollu qarşılaşması “Ruma Hotels” – SOCAR görüşündə qeydə alınıb – 11 qol. Rəqibinə 7:4 hesabı ilə qalib gələn “neftçilər” turnirə qələbə ilə başlayıblar.
“Norm Sement” – “Veysəloğlu” görüşü kifayət qədər gərgin mübarizə şəraitində keçib. Komandaların hərəyə iki dəfə fərqləndiyi qarşılaşma 2:2 hesablı bərabərliklə başa çatıb.
İlk turun ən yaddaqalan məqamlarını və qısa icmalını təqdim edirik:
Qeyd edək ki, ölkəmizdə fəaliyyət göstərən şirkətlər arasında keçirilən “MFL Carlsberg Biznes Liqası”nın eksklüziv tərəfdaşı “Carlsberg” şirkətinin ölkəmizdəki təmsilçisi “Carlsberg Azerbaijan” şirkətidir. Turnirin təşkilati dəstəyi isə AFFA tərəfindən təmin edilir.
Öz qruplarında ilk 4 yeri tutan komandalar play-off oyunlarına vəsiqə qazanacaqlar. Burada isə komandalar 1/4 final və yarımfinalda qüvvələrini sınayacaqlar. Sona qalan iki komanda turnirin qalibi adı uğrunda həlledici final oyununa çıxacaq.
Turnirin qalibi adını qazanan komanda Türkiyə kubokunun final oyununu pulsuz izləmək imkanı əldə edəcək. Komandanın səfər, nəqliyyat və otel xərcləri “Carlsberg Azerbaijan” şirkəti tərəfindən qarşılanacaq.
Daha ətraflı məlumatı liqanın mfl.az, eləcə də 1news İnformasiya Agentliyinin 1news.az saytlarından əldə edə bilərsiniz.
1news.az
