1news.az

14 yaşlı azərbaycanlının Moskva zəfəri: Aydın Süleymanlı “Aeroflot Open-2020”nin qalibi olub

28 Fevral saat 14:26 ~ 3 dəqiqəlik oxu 1355
14 yaşlı azərbaycanlının Moskva zəfəri: Aydın Süleymanlı “Aeroflot Open-2020”nin qalibi olub

14 yaşlı azərbaycanlı Aydın Süleymanlı Moskvada keçirilmiş “Aeroflot Open-2020” beynəlxalq şahmat turnirinin qalibi olub.

1news.az-ın verdiyi xəbərə görə, fevralın 27-də turun sonuncu oyununda o, turnir boyunca liderlik edən Rauf Məmmədovla xalları bölüşüb.

9 turun nəticələrinə görə, dörd şahmatçı 6,5 xal toplayıb. Lakin yekun nəticələrə görə,qalibiyyət Aydın Süleymanlıya qismət olub. Rauf Məmmədov üçüncü yerə sahib olub. Vüqar Əsədli isə 6 xal ilə altıncı yeri tutub.

Aydın Süleymanlı “Aeroflot Open”in ilk qalib gələn azərbaycanlıdır. İlk turnirdə 21 ölkədən 97 şahmatçı iştirak edib. Başlanğıc reytinqdə Aydın 71-ci sırada olub. 9 turun dördündə qalib, 5 partiyada isə heç-heçə oynayıb.

Şahmat camiəsi üçün 14 yaşlı həmyerlimizin qalib gəlməsi sensasiya doğurub.  

Aydın Süleymanlı 2019-cu ildə yeniyetmələr arasında dünya çempionu, Azərbaycanda Yeniyetmələr arasında Şahmat Olimpiadasının (U-16) qalibi olub. Ötən il həmçinin o, “Vüqar Həşimov” klubunun tərkibində Avropa klub Çempionatında da mükəmməl oyun nümayiş etdirib.

“Bu müddət ərzində mənə göstərilən diqqət, dəstəyə və təbriklərə görə çox minnətdaram. İlk növbədə Fərid Abbasova təşəkkür edirəm”, - deyə A.Süleymanlı qələbədən sonra Facebook səhifəsində yazıb.

Uzun illərdir Azərbaycan şahmatında lider olan Şəhriyar Məmmədyarov azərbaycanlı həmkarlarını təbrik edib:

 “Aeroflot Open” turniri sona çatdı. İlk növbədə ondan gözlədiyim oyunu göstərdiyinə görə Rauf Məmmədovu təbrik etmək istərdim. Heç bir partiyada o, pis vəziyətdə olmadı. Sadəcə ən pisi doqquzuncu turda oynadı. Hər şey çox sadədir. O, ürəkdən oynaya bilmədi.

İndi isə Aydın Süleymanlıdan danışmaq istərdim. Bu, inanılmaz uğurdur. Şübhəm yoxdur ki, o, dahi şahmatçı olacaq. Ən azından, Azərbaycan şahmatının ümidi olmaq üçün böyük addım atacaq. Bu əhval-ruhiyyə davam edərsə, o, əvvəlcə 2700 reytinqinə, daha sonra isə 2800 çatacaq.

Şahmat Federasiyası vaxt itirmədən onu yığmaya götürsə yaxşı olar. Milli Yığma yerində sayır, gənclərə dəstək göstərməlidir. Bu gənclik məndən, Teymurdan, Vüqardan güclü olmalıdır. Bu, yalnız Aydına deyil, digərlərinə də aiddir.

Öz yerimi verməyə hazıram. Mən dünyada ikinci şahmatçı olmuşam, lakin bu, azdır. Azərbaycan şahmatının dünyada ən yaxşı olacağını gözləyirəm. Rauf və Aydını, eləcə də ikinci turnirdə fantastik oyun nümayiş etdirən Vüqar Əsədlini də təbrik edirəm”.

Şah (Şəhriyar) çox gözəl təkliflər irəli sürdü. Ümid etmək istərdik ki, Aydın Süleymanlının gələcək irəliləyişi üçün lazımi dəstəyi alacaq. İlk növbədə Azərbaycan Şahmat Federasiyasından. Həqiqətən də, uzun müddətdir belə istedadlı gəncimiz olmayıb.  

Tərcümə: S.Xankişiyeva

 

 

OXUCULARIN SEÇİMİ
REDAKSİYANIN SEÇİMİ
Şahmat BÖLMƏSİNDƏN DİQƏR XƏBƏRLƏR

SON XƏBƏRLƏR

yuxarı
Materiallardan istifadə edərkən sayta mütləq istinad olunmalıdır.

© Copyright 2007-2020 "The First News" İnformasiya Agentliyi,,
Bütün hüquqlar qorunur
entonee.net