SAM-ın nümayəndə heyəti Səudiyyə Ərəbistanı Krallığına səfər edəcək
Prezident yanında Strateji Araşdırmalar Mərkəzinin (SAM) nümayəndə heyəti dekabrın 1-2-də Səudiyyə Ərəbistanı Krallığına (Ciddə şəhəri) səfər edəcək.
1news.az xəbər verir ki, nümayəndə heyətinin tərkibinə SAM-ın direktor müavini Gülşən Paşayeva və Xarici siyasət məsələlərinin təhlili şöbəsinin aparıcı elmi işçisi Kamal Makili Əliyev daxildir.
Səfərin ilk günü SAM-ın nümayəndə heyətinin Kral Əbdüləziz Universitetinin SAM ilə tanışlığı, Mərkəzin direktoru İbrahim Kutubi və daha sonra Azərbaycanın Səudiyyə Ərəbistanı Krallığındakı səfiri Rasim Rzayevlə görüşləri nəzərdə tutulub.
Bildirək ki, dekabrın 2-də Azərbaycanın Səudiyyə Ərəbistanı Krallığındakı səfirliyi, İslam Əməkdaşlıq Təşkilatı və SAM-ın birgə təşkilatçılığı ilə "İslam Əməkdaşlıq Təşkilatının Dağlıq Qarabağ münaqişəsinin həllinə təsiri: keçmiş səylər və gələcək imkanlar" mövzusunda simpozium keçiriləcək.
Simpoziumda “Dağlıq Qarabağ münaqişəsinin həllində İƏT-in rolu: müşahidəçi təşəbbüslərdən fəal iştirakçı roluna” və “Beynəlxalq hüququn özünü doğrultmamasından sonra İƏT üzv dövlətlərinin Dağlıq Qarabağ münaqişəsinin həllinə gələcək tövhələri” mövzularında müzakirələr planlaşdırılır.
1news.az
