"Qızıl Qlobus" mükafatının sahibləri məlum oldu
Amerika Birləşmiş Ştatlarının Los-Anceles şəhərində 73-cü "Qızıl Qlobus" mükafatının təqdimetmə mərasimi keçirilib.
1news.az RİA Novostiyə istinadən xəbər verir ki, “ən yaxşı dramatik ifaya” nominasiyası üzrə mükafat “Xilas olan” filmindəki ifasına görə Leonardo di Kaprioya verilib.
Hollivud cəmiyyəti tərəfindən 1944-cü ildən etibarən təqdim edilən Amerika kino mükafatı 25 kateqoriyada təqdim edilib. Təqdimatın yayımını NBC kanalı həyata keçirir.
Bu il "Ən yaxşı komediya aktyoru və müzikl" nominasiyasında "Marslı" filmindəki oyununa görə aktyor Mett Deymon fərqlənib.
"Ən yaxşı ikinci plan qadın roluna" görə "Qızıl Qlobus"a britaniyalı Keyt Uinslet layiq görülüb. Aktrisa "Apple" şirkətinin banisi Stiv Cobsun həyat və yaradıcılığına həsr olunmuş filmdə yaratdığı obraza görə bu mükafata sahib olub.
"Stiv Cobs" filminin ssenarisini yazan Aaron Sorkin "Ən yaxşı ssenari müəllifi" nominasiyasında fərqlənib.
Məşhur italiyalı bəstəkar Ennio Morrikone ən yaxşı saundtrek nominasiyasında "Qızıl Qlobus"u aparıb.
Qeyd edək ki, kino sənayesində ikinci mötəbər mükafat sayılan "Qızıl Qlobus" mükafatı Amerika Kino Akademiyasının təsis etdiyi "Oskar" mükafatı üçün proqnoz hesab edilir.
