Azərbaycanda spirtli içki satışına qoyulan qadağa götürüldü - VIDEO
Azərbaycanda spirtli içkilərin nağd pulla satışına qoyulan qadağa aradan qaldırılıb.
1news.az-ın məlumatına görə, bu barədə vergilər nazirinin müavini Sahib Ələkbərov AZTV-də çıxışı zamanı deyib.
Onun sözlərinə görə, tütün məmulatlarının nağd pulla topdan satışına qoyulan qadağa da aradan qalxıb:
“Bu gün Azərbaycanda ticarət və ictimai iaşə müəssisələrində 86 mindən çox pos-terminal var. Ehtiyac olarsa əlavə pos-terminalların quraşdırılması üçün hər cür imkanlarımız var. Eyni zamanda ölkədə 6 milyondan çox ödəniş mövcuddur. Sadəcə olaraq insanlar özləri buna hazır olmalıdırlar. Ona görə də bu məsələni geniş təbliğ etməyə ehtiyac var.O ki, qaldı spirtli içkilərin nəğdsiz ödənilməsinə, burada prinsip etibarilə ciddi bir sual, ciddi bir problem yoxdur. Sadəcə olaraq sənədləşmə ilə bağlı məsələlər var.
Bizdə olan məlumata görə, həm bizə və Nazirlər Kabinetinə, həm də Prezident Administrasiyasına və şəxsən ölkə prezidenti cənab İlham Əliyevə çoxsaylı müraciətlər olur ki, bu sənədləşmə işlərinin başa çatdırılması üçün müəyyən zaman tələb olunur. Bütün bunları nəzərə alaraq dövlət başçımız yenə sahibkarlara öz dəstəyini göstərir və tapşırıq verilib ki, bu qaydaların tətbiqi müvəqqəti olaraq dayandırılsın. Yəni hazırlıq işləri tam başa çatdıqdan sonra yəqin ki, bu məsələ barəsində ayrıca qərar veriləcək”.
Nazirin sözlərinə görə, qaydaların tətbiqinin dayandırılması həs istehsalçılar, həm də pərakəndə və topdan satışla məşğul olan ticarətçilərə sənədləşdirmə işlərini başa çatdırmağa imkan verəcək:
“Çünki, bunlarda xeyli miqdarda mal qalığı var, bunlar sənədləşməyib. Sənədləşmə məsələləri həllini tapmalıdır. Eyni zamanda, mağazalarda, başqa obyektlərdə bu spirtli içkilərin həm nağd qaydada, sərbəst şəkildə, həm də nağdsız qaydada alınması seçimi alıcılardan asılıdır. Alıcılar hansı qaydada istəsələr, satıcılar buna hazırdırlar”.
Qeyd edək ki, 2016-cı ilin yanvarın 1-dən etibarən “Aksiz markası ilə markalanmalı olan malların Azərbaycan ərazisində dövriyyəsinin tənzimlənməsi qaydaları” qüvvəyə minib. Bu qaydalara əsasən markalanmalı malların (tütün məmulatlarının pərakəndə satışı istisna olmaqla) satılması və satış məqsədi ilə alınması zamanı həmin malların dəyərinin nağd qaydada ödənilməsinə yol verilmir”.
1news.az
