İstanbulda terror aktı zamanı həlak olan 10 nəfərin hamısı əcnəbidir

Türkiyə hökuməti dünən İstanbulun Sultan Əhməd meydanında baş verən terror aktı barədə yeni məlumat yayıb.

1news.az-ın NTV telekanalına istinadla verdiyi xəbərə görə, həlak olanlardan 8 nəfəri –Almaniya, 1 nəfər – Cənubi Koreya, 1 nəfər isə – Peru vətəndaşlarıdır. Bununla yanaşı, 15 yaralıdan 9 nəfəri də əcnəbidir ki, onlar İstanbulun beş xəstəxanasında müalicə olunurlar. Bundan əlavə, yaralılardan 3-nün vəziyyəti ağır kimi qiymətləndirilir.

Eyni zamanda, Almaniyanın DİN rəhbəri Tomas de Mezer bu gün İstanbula gələrək türk həmkarı Əfqan Aloy ilə dünənki terror aktı barədə müzakirələr aparacaq.

Almaniyaya məxsus “Lebenslust” turizm firması Türkiyədə həlak olanların aldığı turpaket barədə məlumat verib:

“Onlar İstanbulda bir gün qalmalı idilər.Daha sonra isə Dubaya uçaraq Əbu-Dabiyə yola düşməli idilər. Turpaketin qiyməti 1500 avro dəyərindədir”.

Eyni zamanda, Türkiyənin bir çox KİV-i məlumat yayıb ki, Sultan Əhməd meydanında terror aktı törədən 28 yaşlı kamikadze Suriyadan deyil, Səudiyyə Ərəbistanındandır.

1news.az