Ötən ilin dekabrında sənaye məhsullarının istehsalçı qiymətləri 0,4% bahalaşıb
2015-ci ilin dekabr ayında mədənçıxarma sənayesi üzrə istehsalçı qiymətləri 1,0 faiz bahalaşıb, emal sənayesi üzrə 2,5 faiz ucuzlaşıb, su təchizatı; tullantıların təmizlənməsi və emalı və elektrik enerjisi, qaz və buxar istehsalı, bölüşdürülməsi və təchizatı sahələri üzrə isə qiymətlərdə dəyişiklik baş verməyib.
1news.az-ın Dövlət Statistika Komitəsinə istinadla verdiyi xəbərə görə, ümumilikdə sənaye məhsullarının istehsalçı qiymətləri əvvəlki ayla müqayisədə 0,4 faiz bahalaşıb.
Mədənçıxarma sənayesində istehsalçı qiymətləri xam neft üzrə 1,0 faiz bahalaşıb, metal filizlərinin hasilatı üzrə isə 4,2 faiz ucuzlaşıb.
Ay ərzində emal sənayesində istehsalçı qiymətləri əczaçılıq məhsullarının istehsalı üzrə 6,0 faiz, kimya sənayesi üzrə 0,7 faiz, ağac emalı və ağacdan məmulatların istehsalı və tütün məmulatlarının istehsalı üzrə 0,2 faiz, qida məhsullarının istehsalı üzrə 0,1 faiz bahalaşıb, neft məhsullarının istehsalı üzrə 5,2 faiz, metallurgiya sənayesi üzrə 2,1 faiz, içki istehsalı üzrə isə istehsalçı qiymətləri 1,9 faiz ucuzlaşıb. Emal sənayesinin digər fəaliyyət növləri üzrə istehsalçı qiymətlərində ciddi dəyişikliklər baş verməyıb.
1news.az
