Elman Rüstəmov: “Azərbaycanda əmanətçilərin bank əmanətləri tam həcmdə sığortalanacaq”
“Azərbaycanda 6,6 milyon əmanətçinin bank əmanətləri tam həcmdə sığortalanacaq. Bu, vətəndaşların marağına doğru atılmış çox mühüm və ciddi addımdır”.
1news.az-ın verdiyi xəbər görə bunu, Mərkəzi Bankın İdarə Heyətinin sədri Elman Rüstəmov Milli Məclisin İqtisadi siyasət, sənaye və sahibkarlıq, həmçinin, Hüquq siyasəti və dövlət quruculuğu komitələrinin birgə iclasında çıxışı zamanı bildirib.
"Əmanətlərin sığortalanması haqqında" qanun layihəsinə dəyişiklik edilməsilə bağlı müzakirələr zamanı çıxış edən E.Rüstəmov qeyd edib ki, MDB ölkələrinin heç birində belə bir hüquqi sənəd yoxdur.
“Bu cür qanunlar 2008-ci ildə dünyada yaşanan qlobal maliyyə-iqtisadi böhranı ilə əlaqədar onlarla aparıcı, inkişaf etmiş ölkələrdə qəbul edilib”, - qeyd edən Mərkəzi Bank sədri sözlərinə əlavə edib ki, Azərbaycan da bu ölkələrin nümunəsinə uyğun olaraq addım atıb və oxşar layihə hazırlayıb.
Onun sözlərinə görə, bu qanun bank sektorunda qeyri-sabitlik dövründə aktual olacaq:
“Belə ki, bank sektorunda müəyyən problemlər yaranarsa, dərhal bu qanun dövriyyəyə girəcək, bank sektorunda tam sabitlik yarandıqdan sonra isə ona ehtiyac qalmayacaq”, - o, sözlərinə aydınlıq gətirdi.
E.Rüstəmovun sözlərinə görə, bank əmanətləri milyonlarla ölkə vətəndaşının gəlir mənbəyidir. Əmənətlərin tam sığortalanması isə ölkənin bank sisteminə etimadı daha da artıracaq.
O qeyd etdi ki, bu gün Azərbaycanın bank sektorunda vəziyyət sabit və tənzimlənəndir.
“Əlbəttə ki, bəzi banklarla müəyyən problemlər var, lakin ümumilikdə proses tənzimlənir”, - Mərkəzi Bankın rəhbəri bildirib.
Öz növbəsində, iqtisadiyyat və sənaye naziri Sahin Mustafayev də bildirib ki, bu qanunlayihəsi Azərbaycan vətəndaşının və əmanətçilərinin hüquqlarının qorumasını nəzərdə tutan bir sənəddir:
"Bu, irəliyə doğru atılmış çox mühüm addımdır".
1news.az
