Brüsseldə müştəri qıtlığı səbəbindən otel qiymətləri 70 faiz ucuzlaşıb

Belçikanın paytaxtı Brüsseldə müştəri çatışmazlığı səbəbindən otellər qiymətləri 70 faiz aşağı salıb.

1news.az-ın AZƏRTAC-a istinadən verdiyi xəbərə görə, Belçikada baş verən terror aktlarından sonra xarici turistlərin çoxu otel nömrələrinin rezervasiyasını ləğv edərək bu ölkəyə səfərdən imtina edib.

Brüsselin mehmanxana biznesi assosiasiyasının məlumatına əsasən, hazırda paytaxt otellərinin cəmi 20 faizi doludur.

Xatırladaq ki, martın 22-də səhər saatlarında Brüsselin beynəlxalq hava limanında və metroda törədilən partlayışlar nəticəsində 35 nəfər həlak olmuş, 340 nəfər isə müxtəlif dərəcəli bədən xəsarətləri almışdı.

1news.az