Putin: “Mən elə ermənilər və azərbaycanlıları tanıyıram ki, onlar öz aralarında normal münasibətləri saxlayıb” - VİDEO

Canlı yayım zamanı Rusiya prezidenti Vladimir Putin Dağlıq Qarabaqda bu yaxınlarda erməni işğalçı qüvvələrinin təxribatı nəticəsində həyata keçirilən və hər iki tərəfdən itkilərlə nəticələnən eskalasiya haqqında danışıb.

Putinin fikrincə, Dağlıq Qarabağ münaqişəsinin həlli zamanı “maksimal dərəcədə ehtiyatlı olmaq lazımdır”.

O qeyd edib ki, bu uzun zamandan bəri davam edən münaqişədir. Yaxın günlərdə baş verən toqquşmadan təəssüfləndiyini bildirib.

“Biz münasib qərar qəbul etmək üçün əlimizdən gələni edəcəyik. Problemin uzunmüddətli həllinə çalışmaq lazımdır. Bu problem yalnız siyasi vasitələrlə həll oluna bilər. Bir neçə il əvvəl biz demək olar ki, bunu əldə etmişdik. Lakin görünür ki, belə deyilmiş. Biz bu problemi həm beynəlxalq təşkilatlar formatında, həm də ikitərəfli formatda həll edəcəyik.

Kimin nə deməyindən asılı olmayaraq biz münaqişənin həll olunmasını istəyirik, hər iki tərəflə əməkdaşlıqda maraqlıyıq. Rusiyada böyük sayda erməni və azərbaycanlı yaşayır. Mən elə ermənilər və azərbaycanlılar tanıyıram ki, bu faciəvi hadisələrə baxmayaraq onlar mehriban şəxsi münasibətləri davam etdirirlər. Bu çox vacibdir”,- Putin deyib.

Bununla yanaşı onun fikrincə, şübhəsiz ki, son qərar erməni və Azərbaycan xalqı tərəfindən veriləcək.

1news.az