Elmar Məmmədyarov: Azərbaycan Qarabağla bağlı danışıqların nəticəsini görmək istəyir

Azərbaycan Dağlıq Qarabağın sülh yolu ilə həllinin tərəfdarıdır, lakin danışıqların nəticəsini görmək istəyir.

1news.az-ın verdiyi məlumata əsasən, bunu Azərbaycanın xarici işlər naziri Elmar Məmmədyarov deyib: “Biz münaqişənin sülh yolu ilə həllinin tərəfdarıyıq. Lakin danışıqların danışıq naminə getməsini istəmirik. Onların nəticəsini görmək istəyirik”.

Nazir Sankt-Peterburqda Azərbaycan və Ermənistan prezidentlərinin görüşünün nəticələrini müsbət qiymətləndirərək, tərəflərin konkret sənəd üzrə məzmunlu danışıqlara başladığını bildirib.

Qeyd edək ki, iyunun 30-u Bakıda Elmar Məmmədyarovla almaniyalı həmkarı Frank-Valter Ştaynmayerin birgə mətbuat konfransı baş tutub.

Rusiyanın münaqişənin həllində rolu ilə bağlı sualı cavablandırarkən, nazir RF-nın Cənubi Qafqazın təhlükəsizliyinin təmin edilməsində vacib rol oynadığını və Azərbaycanın yaxın tərəfdaşı olduğunu qeyd edib.

“Azərbaycanın Rusiyadan silah alması, ölkənin münaqişə vəziyyətində olması ilə bağlıdır. Azərbaycan digər dövlətlərdən də silah alır.

Ümid edirəm ki, münaqişənin həlli ilə bağlı dərin məzmunlu danışıqlar davam edəcək və biz onların nəticə verəcəyinin şahidi olacayıq”, - deyə, nazir əlavə edib.

1news.az