Zaqatalada iki motosiklet toqquşdu: ölən və yaralanan var

Zaqatalada ölümlə nəticələnən yol-nəqliyyat hadisəsi baş verib.

1news.az-ın Daxili İşlər Nazirliyinə istinadən verdiyi xəbərə görə, hadisə dünən saat 23:00 radələrində sözügedən rayonun Danaçı kəndində qeydə alınıb.

Belə ki, rayon sakini Bilal Nəbiyev idarə etdiyi dövlət qeydiyyat nişanları olmayan “İJ” markalı motosikleti yolun kənarında dayanmış həmyerlisi Bəxtiyar Mamayevə məxsus “İJ” markalı motosikletə vurub.

Nəticədə B.Nəbiyevin sərnişini, Bakı şəhər sakini Pyotr Kuznetsov hadisə yerində ölüb, özü isə xəstəxanaya yerləşdirilib.

Faktla bağlı Zaqatala Rayon Polis Şöbəsi tərəfindən araşdırma aparılır.

1news.az