“MFL Kubok”unun finalı canlı yayımlanacaq
Həvəskar futbolçuların “MFL San Marino Kuboku” artıq final mərhələsindədir.
1news.az xəbər verir ki, bu çempionatın qalib komandası AFFA-nın dəstəyi ilə milli yığmamızla birlikdə Azərbaycan - San Marino oyununu izləməyə gedəcək.
Avqustun 22-də, saat 21:00-da “Sportster” meydançasında baş tutacaq final qarşılaşmasında çempionatın ən güclü iki komandası – “Azfar” və “Juventus Baku” üz-üzə gələcək.
Xatırladaq ki, “MFL San Marino Kuboku” iyulun 22-də 40 komandadan olan 400 həvəskar futbolçu ilə start başlayıb. MFL-in təşkil etdiyi ilk turnirdə komandaların limit sayı 24 olsa da, ikinci çempionatda müraciətlərin çoxluğunu nəzərə alaraq, təşkilatçılar bu sayı 40-a qaldırılmışdı.
Final qarşılaşmasını izləmək üçün turnirin son oyununa AFFA-dan rəsmilər, milli yığmadan oyunçular, eləcə də məşhur simalar dəvət olunublar.
Bundan əlavə, final qarşılaşması MFL-in rəsmi “facebook” səhifəsində - https://www.facebook.com/mfl.baku - canlı yayımlanacaq.
“MFL San Marino Kuboku” çempionatının təşkilatçıları MFL şirkəti və “Sport Marketing Group” - SMG şirkətidir. Çempionatın əsas tərəfdaşı AFFA-dır. Oyunlara ev sahibliyini isə “Sportster” Kompleksi edir.
Nəzərinizə çatdıraq ki, ikinci “MFL Kuboku” başa çatdıqdan sonra tamhəcmli turnir başlayacaq ki, bu liqada həvəskar futbolçular 1 il ərzində ən güclü mini futbol komandası adı uğrunda mübarizə aparacaqlar.
1news.az
