Möhsün Pakayin: “İran idmanın siyasi məqsədlər üçün istifadəsini məqbul saymır”
İranda ermənilərin idman olimpiadasının keçirilməsinin və qondarma “Dağlıq Qarabağ Respublikası”nın “nümayəndələrinin” bu yarışlarda iştirak etməsi barədə xəbərlərin yayılmasının ardından İranın Azərbaycandakı səfiri Möhsün Pakayin mətbuata açıqlama verib.
1news.az-ın verdiyi məlumata əsasən, açıqlamada deyilir:
“İranda yaşayan ermənilərin idman olimpiadasının keçirilməsi daxili bir tədbirdir və dini azlıqlara hörmət əlaməti olaraq keçirilir. Yarışların təşkilat komitəsi Gürcüstan və Ermənistanı qonaq olaraq bu yarışlarda iştirak etmək üçün dəvət etmişdir və bunlardan başqa heç bir ölkə və ya region yarışlarda iştirak etməmişdir. Hər hansı bir iştirakçı ölkənin idman geyimində başqa bir tərəfin gerbindən və ya simvolundan istifadə edilməsi təşkilat komitəsi ilə razılşadırılmadan həyata keçirilmişdir. Aydındır ki, İran İslam Respublikası idmanın siyasi məqsədlər üçün istifadəsini məqbul saymır və ölkəmizin Qarabağ münaqişəsi barədə siyasəti dəyişməyib. İranın məsul şəxsləri də məhz İranda yaşayan dini azlıqlara hörmət əlaməti olaraq bu tədbirdə iştirak etmişlər”.
Qeyd edək ki, sentyabrın 13-ü İranın paytaxtı Tehranda yerləşən "Ararat" klubunda 48-ci Erməni Olimpiadasının açılışı keçirilib.
Açılış mərasimində Tehranın erməni pravoslav yeparxiyasının nümayəndəsi arxiyepiskop Sebuh Sarkisyan, Ermənistanın İrandakı səfiri, İranın Ermənistandakı səfiri və Ermənistanın tanınmış atletləri iştirak ediblər.
İran Milli Olimpiya Komitəsinin prezidenti Kiamərz Haşimi və İran prezidentinin milli və dini azlıqlarla iş üzrə müşaviri Əli Yunisi də tədbir iştirakçıları arasında olub.
10 günlük oyunlar çərçivəsində İran, Ermənistan və Gürcüstandan olan 800 erməni atlet 9 idman növü üzrə yarışacaq.
Rəsmi məlumatlarda qeyd edilməsə də, olimpiadada qondarma Dağlıq Qarabağ Respublikası da təmsil olunub. Bunu açılış zamanı çəkilmiş fotoşəkillər sübut edir. Belə ki, fotoşəkillərdə erməni idmançıların geyimlərinin üzərində "Artsax" yazısı və separatçı rejimin bayrağının əksini aydın görmək mümkündür.
Mövzu ilə əlaqədar oxuyun:
1news.az
