İlham Əliyev Türkiyə tərəfindən vurulan Su-24 barədə: burada xarici təxribat oldu

Azərbaycan Prezidenti İlham Əliyev Türkiyə tərəfindən vurulan Rusiyanın Su-24 hərbi təyyarəsi bağlı insidentdə Moskva və Ankaranın yaxınlaşmasını narahatla izləyən güclərin təxribatının olduğunda əminliyini bildirib.

1news.az-ın RİA Novosti-yə istinadən verdiyi məlumatına əsasən, dövlət başçısı iki ölkə arasında münasibətlərin normallaşmasını ədalətin bərqərar olması, bu faciəvi anlaşılmazlığın aradan qaldırılması kimi qiymətləndirib.

“Böyük ehtimalla bu hadisənin səbəbləri araşdırılacaq. Bildiyimə görə, artıq araşdırılıb. Əlimizdə olan məlumatlara əsasən, burada Moskva və Ankaranın yaxınlaşmasını narahatla izləyən güclərin təxribatı olmadan ötüşməyib. Sadəcə olaraq, müəyyən obyektiv müşahidələr əsasında bunu belə qiymətləndirirəm”, - deyə Azərbaycan Prezidenti RİA Novosti-yə müsahibsəində bildirib.

Bunun xarici təxribat olub-olmadığı ilə bağlı suala isə dövlət başçısı “Bu amili istisna etmək olmaz” cavabı verib.

“Hər-halda, bu hadisə baş verəndə, birinci ağlımıza gələn o oldu ki, bunu istisna etmək olmaz. Çünki bu tamamilə Türkiyənin maraqlarına zidd idi. Və kiminsə bilərəkdən bu addımı atacağı ağlımızın ucundan belə keçməmişdi.

Əlbəttə ki, belə faciəvi hadisədən sonra emosiyalar önə çıxdı, və müəyyən mənada vəziyyəti mürəkkəbləşdirdi, və nə baş verdiyini ayırd etmək çətin idi. Sonra isə emosiya emosiya dalınca gəlirdi, hər sözə cavab verilirdi, və bu tendensiya dayandırılmalı idi. Artıq o dayandırılıb. Hal-hazırda araşdırmaq lazımdır. Mən düşünürəm, demək olar tam əminəm ki, təxribatsız ötüşməyib. Çünki Rusiya və Türkiyə arasında münasibətlərin ruhu və xüsusiyyəti Rusiyanın hərbi aviyasiyasının uçuşlarına belə reaksiya üçün zəmin yaratmırdı”, - deyə Prezident İlham Əliyev qeyd edib.

1news.az