Külli miqdarda xarici valyutanın ölkə ərazisindən çıxarılmasının qarşısı alınıb
Hava Nəqliyyatında Baş Gömrük İdarəsinin əməkdaşları iki fakt üzrə külli miqdarda xarici valyutanın ölkə ərazisindən bəyan etməməklə çıxarılmasına cəhdin qarşısını alıblar.
1news.az-ın Dövlət Gömrük Komitəsinə istinadən verdiyi xəbərə görə, Heydər Əliyev Beynəlxalq Hava Limanında Bakı-İstanbul və Bakı-Moskva aviareysləri ilə getmək istəyən Türkiyə Respublikası və Rusiya Federasiyasının vətəndaşları gömrük nəzarəti zonasına daxil olarkən mütləq qaydada bəyan etməli olduqları xarici valyutanı əvvəlcədən gömrük orqanına təqdim etməyiblər. Lakin hər iki vətəndaşın yükü rentgen aparatından keçirilərkən monitorda kağız pula bənzər təsvirlər göründüyü üçün onlar gömrük əməkdaşları tərəfindən saxlanılıblar.
Türkiyə Respublikasının vətəndaşı sorğu-sual edilən zaman əl yükündə xarici valyutanın olmadığını bildirsə də, yoxlama zamanı ona məxsus bel çantasında sellofan paketə yığılmış geyim əşyalarının arasında olan üç ədəd corabın içərisindən 234 ədəd - hər biri 100 ABŞ dolları nominalında əsginaslar olmaqla, cəmi 23.400 ABŞ dolları aşkar edilib. Şəxsi yoxlama zamanı isə həmin vətəndaşın şalvarının cibindən 16 ədəd, paltosunun cibindən isə 33 ədəd - hər biri 100 ABŞ dolları nominalında əsginaslar olmaqla, cəmi 4900 ABŞ dolları aşkar olunub.
Öz növbəsində, Rusiya Federasiyasının vətəndaşına məxsus çamadanın yoxlanılması zamanı, orada olan gödəkçənin cibindən 260 ədəd - hər biri 100 ABŞ dolları nominalında əsginaslar olmaqla, cəmi 26.000 ABŞ dolları aşkar edilib. Bundan sonra isə vətəndaş özü şalvarının cibindən 10 ədəd - hər biri 100 ABŞ dolları nominalında əsginasları çıxararaq təqdim etməli olub.
Beləliklə, sözügedən şəxslərdən əvvəlcədən gömrük orqanına təqdim edilməyən, elektron və ya kağız üzərində yazılı formada bəyan olunmayan cəmi 55 min 300 ABŞ dolları aşkar edilərək protokol əsasında götürülüb.
Hər iki faktla bağlı araşdırma aparılır.
1news.az
