Azərbaycan ilə Gürcüstan arasında dövlət sərhədlərinin təhlükəsizliyi məsələləri müzakirə olunub – FOTO

Gürcüstanda səfərdə olan Dövlət Sərhəd Xidmətinin rəisi - Sərhəd Qoşunlarının Komandanı Elçin Quliyev, bu ölkənin Daxili İşlər Nazirliyinin Sərhəd Polisinin rəisi, Dato Nikoliaşvili və Azərbaycanın Gürcüstandakı səfiri Dursun Həsənov fevralın 27-də Tbilisinin mərkəzindəki Heydər Əliyev parkında Ulu Öndərin abidəsi önünə əklil qoyublar.

Dövlət Sərhəd Xidmətinin rəis müavini, general-leytenant Fərhad Tağızadə səfərlə bağlı jurnalistlərə müsahibəsində bildirib ki, Azərbaycan nümayəndə heyətinin Gürcüstana səfəri bu ölkənin Sərhəd Polisi rəhbərliyinin dəvəti əsasında reallaşdırılıb. Səfər çərçivəsində general-polkovnik Elçin Quliyev Gürcüstanın daxili işlər naziri Georqi Mqebrişvili, Sərhəd Polisinin və patrul xidmətinin rəisləri ilə görüşüb.

Görüşlərdə Azərbaycan ilə Gürcüstan arasında dövlət sərhədlərinin mühafizəsi sahəsində əməkdaşlığın perspektivləri, təcrübə mübadiləsi, bu sahədə normativ-hüquqi baza, sərhəd keçid məntəqələrində vəziyyət, beynəlxalq terrorçuluq, qeyri-qanuni miqrasiya, narkotiklərin qaçaqmalçılığı, sərhəd təhlükəsizliyinə təhdidlər və s. məsələlər müzakirə olunub. Hər iki ölkənin sərhəd xidmətləri arasında əməkdaşlığa dair memorandumun imzalanması barədə razılıq əldə olunub.

Görüşlərdə sərhədlərin delimitasiyası və demarkasiyası məsələlərinin də müzakirə edildiyini vurğulayan F.Tağızadə deyib: “Bu günədək sərhədlərimizin təqribən 65 faizi delimitasiya olunub. Qalan sahələr üzrə məsləhətləşmələr və müzakirələr davam edir. Bu ilin aprelində Gürcüstan ilə dövlət sərhədlərinin demarkasiyası və delimitasiyası üzrə komissiyaların görüşü keçiriləcək”.

Qeyd olunub ki, müzakirələr zamanı Azərbaycan Prezidenti İlham Əliyevin ölkəmizə turist axınının sürətləndirilməsinə dair 2017-ci il 20 fevral tarixli Sərəncamına uyğun olaraq, həmsərhəd ölkələr, o cümlədən Gürcüstan ilə dövlət sərhədlərinin buraxılış mənbələrindən şəxslərin sürətli keçidinin təmin edilməsi məqsədilə qarşılıqlı əlaqələndirmə fəaliyyətinin təkmilləşdirilməsinin vacibliyi vurğulanıb.

AZƏRTAC