Mladen İvaniç: Bakı platforması müsbət təşəbbüslərin irəli sürüldüyü məkandır

Böyük çətinliklərin olduğu bir dövrdə bizi sülhün, tərəqqi və ədalətin olduğu dünyaya bir addım daha yaxınlaşdıran məsələlərlə bağlı fikir mübadiləsi aparmaq liderlər üçün əhəmiyyətlidir.

Diasporla İç üzrə Dövlət Komitəsindən 1news.az-a verilən məlumata görə, bu fikirləri Bosniya və Herseqovina Rəyasət Heyətinin sədri Mladen İvaniç martın 16-17-də keçiriləcək V Qlobal Bakı Forumu ilə bağlı verdiyi açıqlamasında deyib. O bildirib ki, Bakı platforması bu problemlərin müzakirəsi baxımından böyük əhəmiyyət kəsb edir və ən önəmlisi müsbət təşəbbüslərin irəli sürüldüyü bir məkandır.

Nizami Gəncəvi Beynəlxalq Mərkəzinin böyük və müsbət təsirə malik mühüm bir Forumun əsasını qoyduğunu vurğulayan Mladen İvaniç əlavə edib ki, biz də öz növbəmizdə bütün səylərimizi bu potensialın reallaşması naminə səfərbər etməliyik: “Mən Nizami Gəncəvi irsinin tədqiqi üçün yaradılmış şərait və Qlobal Bakı Forumuna öz töhfəmi verməyim üçün mənə verilmiş bu fürsətə görə qürur duyur və bununla fəxr edirəm”, – deyə Rəyasət Heyətinin sədri bildirib.

Qeyd edək ki, Diasporla İş üzrə Dövlət Komitəsinin dəstəyi və Nizami Gəncəvi Beynəlxalq Mərkəzinin təşkilatçılığı ilə keçirilən V Qlobal Bakı Forumunda Bosniya və Herseqovina da daxil olmaqla, altı ölkənin dövlət başçısı iştirak edəcək. Ümumilikdə isə Forumun işində 50 ölkədən 200-dən çox qonağın – nüfuzlu ictimai-siyasi xadimlərin, elm adamlarının və ekspertlərin iştirakı gözlənilir.

1news.az