Rusiyalı deputat Dmitri Savelyevə “Azərbaycanın dostu” qızıl ordeni təqdim olunub
Moskvada Rusiya Dövlət Dumasının deputatı, Rusiya-Azərbaycan Parlamentlərarası dostluq qrupunun sədri Dmitri Savelyevə “Azərbaycanım” (“Moy Azerbaycan”) beynəlxalq jurnalı tərəfindən təsis edilmiş “Azərbaycanın dostu” qızıl ordeni təqdim olunub.
Ordeni Dmitri Savelyevə jurnalın redaktoru Emil Nəsirli təqdim edib. E.Nəsirli deyib: “Rusiya-Azərbaycan Parlamentlərarası dostluq qrupunun sədri Dmitri Savelyev Azərbaycan haqqında həqiqətlərin, o cümlədən Ermənistan-Azərbaycan, Dağlıq Qarabağ münaqişəsi və Ermənistanın işğalçı siyasəti ilə bağlı faktların dünya ictimaiyyətinə çatdırılmasında böyük işlər görür”.
Ordenə görə minnətdarlığını bildirən Dmitri Savelyev qeyd edib ki, Azərbaycan bütün sahələrdə Rusiyanın əsas tərəfdaşlarından biridir və dünyadakı mürəkkəb vəziyyətə baxmayaraq, ölkə rəhbərliyinin müdrik siyasəti nəticəsində öz uğurlu inkişafını davam etdirir. Azərbaycanın demokratiya və multikulturalizm prinsiplərinə əsaslanan müstəqil xarici siyasəti ölkənin beynəlxalq nüfuzunun daha da möhkəmlənməsinə imkan yaradıb.
Xocalı faciəsinə də toxunan rusiyalı deputat bu qətliamı təkcə Azərbaycan xalqının deyil, bütün dünyanın kədəri və insanlığa qarşı cinayət kimi dəyərləndirib.
Dmitri Savelyev beynəlxalq jurnalın kollektivinə hər iki ölkənin rifahı naminə ictimai və peşəkar fəaliyyətdə uğurlar arzulayıb. Əmin edib ki, bundan sonra da Rusiya və Azərbaycanın maraqlarını qoruyacaq.
AZƏRTAC
