Aprel şəhidimizin hərbi geyim dəsti muzeydə sərgilənəcək – FOTO
Milli Azərbaycan Tarixi Muzeyinə şəhid materialları təhvil verilib
Milli Azərbaycan Tarixi Muzeyi Azərbaycan torpaqları uğrunda canından keçən, şəhidlik zirvəsinə ucalan Vətən övladlarına məxsus materialların qorunub nümayiş etdirilməsində, təbliğində və gələcək nəsillərə ötürülməsində mühüm missiyanı həyata keçirir.
Belə ki, aprel döyüşlərində şəhid olmuş Milli Ordunun baş leytenantı Cavid Dədəkişiyevin atası Gülbaba Dədəkişiyev Milli Azərbaycan Tarixi Muzeyini ziyarət edib.
Şəhid atası Muzeyin direktoru, akademik Nailə Vəlixanlı ilə görüşüb, Cavid Dədəkişiyevə məxsus 6 ədəd fotoşəkil və hərbi geyim dəstini Muzeyə təqdim edib.
Görüş əsnasında Nailə Vəlixanlı şəhid atasına başsağlığı verib səbir diləyib və verilən materiallara görə öz təşəkkürünü bildirib.
Gülbaba Dədəkişiyev də Azərbaycan şəhidlərinin xatirəsini əziz tutduğu üçün Muzey rəhbərliyinə öz minnətdarlığını bildirib.
1news.az
