Bakı-Sumqayıt yolundakı qəzada ölənlərin sayı artır, 2 nəfərin vəziyyəti kritikdir – FOTO - VİDEO – YENİLƏNİB
Bu gün səhər saatlarında Bakı-Sumqayıt yolunda baş verən dəhşətli qəza ilə bağlı yeni məlumatlar açıqlanıb.
1news.az-a Səhiyyə Nazirliyindən verilən xəbərə görə, qəza nəticəsində ölənlərin sayı 5 nəfərə çatıb.
Yaralı olan 2 nəfərin vəziyyəti kritikdir. 17 nəfər xəsarət alan sərnişinlər Sumqayıtdakı xəstəxanalara yerləşdiriliblər.
12:39
Bakı-Sumqayıt yolunda qəza törətmiş 40 yaşlı Namiq Hüseynovun idarə etdiyi mikroavtobusda həlak olan tələbələrin adları açıqlanıb.
1news.az-a Azərbaycan Baş Dövlət Yol Polisinin İdarəsindən verilən xəbərə görə, bunlar Quliyeva Çinarə Azər qızı (1996-cı il), Nəsibov İbrahim Xəqani oğlu (1996-cı il), Muradova Roza Eynulla qızı (1997-ci il), Quliyev İbrahim Vuqar oğlu (1996-cı il), Caniyev Rəşad Füzüli oğludur (1997-cı il).
12.14
Bakı-Sumqayıt yolunda qəza törətmiş 40 yaşlı Namiq Hüseynov saxlanılıb.
1news.az-a Azərbaycan Baş Dövlət Yol Polisinin İdarəsindən verilən xəbərə görə, ona qarşı Cinayət Məcəlləsinin 263 (Yol hərəkəti və nəqliyyat vasitələrinin istismarı qaydalarının pozulması) maddəsi ilə bağlı cinayət işi qaldırılıb.
Araşdırma aparılır.
11.00
Bu gün səhər saatlarında Bakı-Sumqayıt yolunda baş verən dəhşətli qəza ilə bağlı yeni məlumatlar açıqlanıb.
1news.az-a Səhiyyə Nazirliyindən verilən xəbərə görə, yol qəzasında 4 nəfər həlak olub, 5 nəfər isə ağır xəsarətlər alıb.
“Xəsarət alanlar Kliniki Tibbi Mərkəzin reanimasiya şöbəsinə yatırılıb. Onların vəziyyəti ağırdır”.
10.28
Bakı-Sumqayıt yolunda baş vermiş yol-nəqliyyat hadisəsi nəticəsində xəsarət alanlardan 6 nəfəri Sumqayıt şəhər xəstəxanasına çatdırılıb.
Xəstəxanadan verilən məlumata görə, onların vəziyyəti orta-ağırdır.
09.52
Bakı-Sumqayıt yolunda baş verən yol-nəqliyyat hadisəsi nəticəsində iki nəfərin öldüyü, 5 nəfərin xəsarət aldığı bildirilir.
Belə ki, “Ford-Tranzit” markalı sərnişin mikroavtobusu yolun kənarındakı maneəyə çırpılıb.
İlkin məlumata əsasən, ölənlərin hər ikisi tələbədir.
Qəza yerinə yol polisi və təcili tibbi yardım maşınları cəlb olunub. Yolda avtomobillərin sıxlığı yaranıb.
APA
