“Misir Azərbaycan uşaqlarının gözü ilə”

Frankofoniya həftələri çərçivəsində Fransa-Azərbaycan İnstitutunda “Misir Azərbaycan uşaqlarının gözü ilə” adlı sərgi açılıb.

1news.az-a Misirin Bakıdakı səfirliyindən verilən məlumata görə, sərgini Misiri səfirliyinin Mədəniyyət və Təhsil Əlaqələri Mərkəzinin rəhbəri Əhməd Sami Elaydi açıb.

O bildirib ki, Frankofoniya tədbirləri çərçivəsində aprel ayının 1-dən etibarən bu günə qədər silsilə tədbirlər davam etdirilir. Bu il Frankofoniya ab-havası çox fərqli və rəngarəngdir. Artıq 10 ölkənin Azərbaycandakı səfirliklərinin iştirakı ilə 30-dan çox tədbir keçirilib. Təbii ki, Misir də bu təşkilata üzv dövlət kimi keçən il də, bu il də bu tədbirlərdə yaxından iştirak edir. Bu gün açılışını etdiyimiz sərgi “Misir Azərbaycan uşaqlarının gözü ilə”  adlanır. Gördüyünüz kimi az yaşlı uşaqlar Misir haqqında öz təsəvvürlərini rəsmlərdə göstəriblər”.

Fransanın Azərbaycandakı səfiri xanım Aurelia Buşez böyük maraqla qarşılanan beynəlxalq Frankofoniya həftələrinin gələcəkdə də keçiriləcəyinə əmin olduğunu və Frankofoniya həftələrinin mədəniyyətlərarası dialoqun inkişafına çox böyük töhfə verdiyini vurğulayıb.

Sonra sərgi iştirakçıları azyaşlı müəlliflərin Misir tarixini əks etdirən rəsmləri ilə tanış olublar.

Pərvanə Sultanova