Müdafiə Nazirliyi: “Ermənilərin Tərtər rayonu istiqamətindəki təxribat planı vaxtında aşkar olunub”
Azərbaycan Respublikasının Müdafiə Nazirliyi Ermənistan Silahlı Qüvvələrinin kəşfiyyat və xüsusi xidmət orqanlarının Tərtər rayonu istiqamətində yerləşən bölmələrimizə və yaşayış məntəqələrimizə qarşı genişmiqyaslı təxribat fəaliyyətinin həyata keçirilməsini planlaşdırdıqları barədə məlumat yayıb.
Müdafiə Nazirliyinin mətbuat xidmətindən 1news.az-a verilən məlumata görə, görülən effektiv və önləyici tədbirlər nəticəsində düşmənin bu planı vaxtında aşkar olunub.
“Bütün cəbhə boyu əməliyyat şəraiti və ümumilikdə vəziyyət daim nəzarətimiz altındadır. Eyni zamanda, xəbərdar edirik ki, düşmənin gələcəkdə də bu cür fəaliyyətinin qarşısı daha sərt şəkildə alınacaq. Görüləcək cavab tədbirləri amansız olacaq və qarşı tərəfin verəcəyi böyük itkilərə görə bütün məsuliyyət Ermənistanın cinayətkar hərbi-siyasi rejiminin üzərinə düşəcək”, - deyə Müdafiə Nazirliyinin məlumatında bildirir.
1news.az
