Nazir müavini: "Qarabağ münaqişəsinin həlli üçün başqa yollar axtaracağıq”
“Dağlıq Qarabağ münaqişəsinin sülh yolu ilə həlli vacibdir”.
1news. az-ın məlumatına görə, bunu xarici işlər nazirinin müavini Mahmud Məmməd-Quliyev Bolqarıstanın "Focus" radiosuna açıqlamasında deyib.
O bildirib ki, dövlətlərin ərazi bütövlüyünə və suverenliyinə hörmət edilməlidir: "Son 25 ildə Azərbaycan ərazisinin 20 faizi işğal edilib, bir milyona yaxın insan qaçqın və məcburi köçkün düşüb.
Biz Dağlıq Qarabağ münaqişəsinin həllini üç nöqtədə görürük: ərazilərin tədricən işğaldan azad edilməsi, onların bərpası və məcburi köçkünlərin tədricən həmin yerlərə qayıtması”.
Məmməd-Quliyev əlavə edib ki, Ermənistanın mövqeyi işğal olunmuş ərazilərin demoqrafik quruluşu dəyişdirməyə yönəlib:
“Məqsəd Dağlıq Qarabağı müstəqil dövlət kimi təqdim etmək və ikinci erməni dövləti yaratmaqdır. Azərbaycan münaqişənin sülh yolu ilə həllinə çalışır, amma buna nail olunmadıqda biz başqa yollar axtaracağıq”.
Pərvanə Sultanova
