Səfir: "Norveç və Azərbaycan mühüm qlobal enerji təminatçılarıdır"

Bakıda Norveçin milli bayramı - Konstitusiya Günü və Azərbaycan-Norveç diplomatik əlaqələrinin qurulmasının 25 illiyi münasibətilə rəsmi qəbul təşkil edilib.

1news.az-ın məlumatına görə, tədbirdə  rəsmi şəxslər, Milli Məclisin deputatları, Azərbaycanda akkreditə olunmuş diplomatik korpusun rəhbərləri və ictimaiyyət nümayəndələri iştirak ediblər.

Norveçin Azərbaycandakı səfiri Baard İvar Svendsen bildirib ki, bu il ölkələrimiz arasında diplomatik əlaqələrin yaradılmasının və Norveçin “Statoil” şirkətinin Azərbaycandakı fəaliyyətinin 25 illiyi qeyd olunur. Səfir həm Norveç, həm də Azərbaycanın mühüm qlobal enerji təminatçıları olduğunu vurğulayıb. O, “Statoil”in ötən illər ərzində Azərbaycana 6,5 milyard dollar investisiya yatırdığını bildirib.

Baard İvar Svendsen ki, Norveçin Azərbaycanın ərazi bütövlüyünü tanıdığını və Dağlıq Qarabağ münaqişəsinin sülh yolu ilə həllinin tərəfdarı olduğunu əlavə edib.

Ekologiya və təbii sərvətlər naziri Hüseynqulu Bağırov Azərbaycan rəhbərliyi adından Norveç xalqını və dövlətini təbrik edib.

Ötən 25 il ərzində iki ölkə arasında münasibətlərin yüksələn xətlə inkişaf etdiyini bildirən nazir bu münasibətlərin inkişafında “Statoil” in rolunu xüsusi qeyd edib.

“Münasibətlərimizin inkişafı xalqlarımızın mənafelərinə xidmət edir”, - deyən nazir norveçli dünya şöhrətli alim-səyyah Tur Heyerdalın Azərbaycana səfərlərini, burada apardığı araşdırmaları xatırladıb.

O bildirib ki, Azərbaycanla Norveç arasında hüquqi baza yaradılıb, yüksək səviyyəli səfərlər həyata keçirilib:

“Azərbaycan  bütün ölkələrlə əlaqələrin inkişafında maraqlıdır, bu ölkələr arasında Norveç xüsusi əhəmiyyət daşıyır”.

Pərvanə Sultanova