İlham Əliyev:Türkiyə və Azərbaycan bütün məsələlərdə bir-birinin yanındadır

Türkiyə-Azərbaycan birliyi, əməkdaşlığı bir çox önəmli strateji layihələrin icrasına imkan verir.

1news.az-ın trend-ə istinadla məlumatına görə, bunu Azərbaycan Prezidenti İlham Əliyev İstanbulda keçirilən 22-ci Dünya Neft Konqresində çıxışı zamanı deyib.

Dövlətimizin başçısı qeyd edib: “Əziz qardaşım, hörmətli Prezident Rəcəb Tayyib Ərdoğan! Hörmətli xanımlar və cənablar! Qardaş Türkiyə torpağında yenidən olmağımdan çox məmnunam. Fürsətdən istifadə edərək qardaş Türkiyə xalqına sülh, rifah və tərəqqi arzulayıram.

Prezident Ərdoğana minnətdaram ki, məni bu toplantıya dəvət etdi. Mənə göstərilən qonaqpərvərliyə görə də minnətdaram".

İlham Əliyev bildirib ki, Türkiyə bu gün dünya miqyasında böyük bir gücdür: "Türkiyə dünya gündəliyinin bir çox məsələlərində həlledici sözə malikdir. Bütün bu uğurlar mənim qardaşım Prezident Ərdoğanın liderliyi altında əldə edilibdir. Bu gün Türkiyə uğurla, sürətlə inkişaf edir. Türkiyə Prezident Ərdoğanın liderliyi altında çox böyük və şərəfli yol keçmişdir. Bugünkü toplantı da bunun bir təzahürüdür. Türkiyə gücləndikcə biz də güclənirik, biz də sevinirik. Fürsətdən istifadə edərək qardaş Türkiyə xalqına bütün azərbaycanlı bacı-qardaşlarının səmimi salamlarını çatdırıram".

Dövlət başçısı vurğulayıb ki, Türkiyə və Azərbaycan bütün məsələlərdə bir-birinin yanındadır: "Bizim əməkdaşlığımız çoxşaxəlidir və bütün sahələri əhatə edir, o cümlədən enerji sahəsində Türkiyə-Azərbaycan birliyi, əməkdaşlığı bir çox önəmli strateji layihələrin icrasına imkan verir. Onların içərisində xüsusilə Bakı-Tbilisi-Ceyhan neft kəməri, Bakı-Tbilisi-Ərzurum qaz kəməri və TANAP layihəsini qeyd etmək istərdim".

1news.az