Bu gün Azərbaycan və Ermənistan XİN rəhbərlərinin görüşü gözlənilir

Bu gün Avstriyanın Mauerbax şəhərində ATƏT XİN  Şurasının qeyri-rəsmi görüşü keçiriləcək.

1news.az xəbər verir ki, “Dialoq və əməkdaşlıq yolu ilə etimadın qurulması”  şüarı altında keçiriləcək iclasa ATƏT-in fəaliyyətdə olan sədri, Avstriyanın Avropa, inteqrasiya və xarici işlər üzrə federal naziri Sebastyan Kurts sədrlik edəcək.

ATƏT-ə üzv 57 ölkənin təmsil olunacağı görüşdə əsasən qurum ərazisindəki münaqişələr, təhlükəsizliyə yönəlmiş təhdidlər, terrorla mübarizə, insan hüquqları, qanunun aliliyi və demokratiya, həmçinin bu il 7-8 dekabr tarixlərində Vyanada keçiriləcək ATƏT-in Xarici İşlər Nazirləri Şurasının illik iclasına hazırlıq məsələləri diqqətdə olacaq.

Qeyd edək ki, görüş çərçivəsində Azərbaycan və Ermənistan XİN rəhbərlərinin ATƏT-in Minsk qrupunun həmsədrlərinin iştirakı ilə görüşü də planlaşdırılır. Daha əvvəl rəsmi bakı bu görüşə razılıq verdiyini bəyan edib. 

Pərvanə Sultanova