Millimizin UEFA Millətlər Liqasında rəqibləri müəyyənləşib - FOTO
Bu gün İsveçrənin Lozanna şəhərində UEFA-nın yeni layihəsi olan Millətlər Liqasının ilk mövsümünün püşkatma mərasimi keçirilib.
1news.az-ın məlumatına görə, quruma üzv olan 55 ölkənin millisi 2018/19 mövsümünün qalibi adı uğrunda mübarizədə rəqiblərini tanıyıb.
“D” liqasında mübarizə aparacaq Azərbaycan milli komandası püşkün nəticələrinə görə III qrupda yer alıb. Yığma komandamızın rəqibləri Farer Adaları, Malta və Kosovo milliləridir.
Bu liqada çıxış edəcək digər komandalardan Gürcüstan, Latviya, Qazaxıstan, Andorra birinci, Belarus, Lüksemburq, Moldova və San-Marino yığmaları ikinci qrupda yer alıblar. Makedoniya, Ermənistan, Lixtenşteyn və Cəbəllütariq seçmələri isə dördüncü qrupda mübarizə aparacaqlar.
UEFA Millətlər Liqasında çıxış edəcək 55 milli komanda dörd divizionda yarışacaq. “A” və “B” liqalarının hər birinə 12, “C” liqasına 15, “D” liqasına isə 16 komanda daxil edilib.
Bütün liqalarda komandalar 4 qrupa bölünəcək. A liqasında qrup qalibləri mükafatlar uğrunda yarımfinal və finalda oynamaq imkanı qazanacaq. Digər liqaların qrup birinciləri isə 2020/21 mövsümündə daha yüksək dəstədə çıxış etmək imkanına yiyələnəcək. A, B və C liqalarında qrup sonuncuları növbəti mövsümdə aşağı dəstədə qüvvəsini sınamalı olacaq.
Qrup mərhələsinin nəticələri təkcə liqalar arasında yuxarı-aşağı hərəkət etmək üçün önəmli deyil. AVRO-2020-nin seçmə mərhələsinin püşkatması zamanı yığmaların səbətlərə bölünməsi məhz Millətlər Liqasının nəticələrinə görə gerçəkləşəcək.
Bundan başqa, hər liqadan 1 komanda AVRO-2020-nin final mərhələsinə yüksələcək. Seçmə mərhələdə vəsiqə qazanmayanlar arasında öz qrupunda ən yaxşı olanlar 2020-ci ilin martında pley-offa xoşbəxtlər sırasına düşmək üçün döyüşəcək.
Qrup mərhələsinin görüşləri bu ilin sentyabr-noyabr aylarında oynanılacaq.
Millətlər Liqası
Püşkatma mərasimi
A liqası
I səbət
Almaniya, Portuqaliya, Belçika, İspaniya
II səbət
Fransa, İngiltərə, İsveçrə, İtaliya
III səbət
Polşa, İslandiya, Xorvatiya, Hollandiya
B liqası
I səbət
Avstriya, Uels, Rusiya, Slovakiya
II səbət
İsveç, Ukrayna, İrlandiya, Bosniya və Herseqovina
III səbət
Şimali İrlandiya, Danimarka, Çexiya, Türkiyə
C liqası
I qrup
İsrail
Albaniya
Şotlandiya
II qrup
Estoniya
Finlandiya
Yunanıstan
Macarıstan
III qrup
Kipr
Bolqarıstan
Norveç
Sloveniya
IV qrup
Litva
Monteneqro
Serbiya
Rumıniya
D liqası
I qrup
Andorra
Qazaxıstan
Latviya
Gürcüstan
II qrup
San Marino
Moldova
Lüksemburq
Belarus
III qrup
Kosovo
Malta
Farer adaları
Azərbaycan
IV qrup
Cəbəllütariq
Lixtenşteyn
Ermənistan
Makedoniya
Püşkün qaydalarına əsasən, iki cütlük eyni qrupda yer ala bilməz. Ölkələr arasında münasibətləri nəzərə alan UEFA B liqasında Rusiya və Ukrayna, D liqasında Azərbaycanla Ermənistanı ayrı qruplara salacaq. Lakin pley-offda oynamalı olacaqları halda bu rəqiblərin də dueli qaçılmaz olacaq.
Qeyd edək ki, artıq oyunların keçirilmə tarixləri də bəllidi. Qrup oyunları 2018, final mərhələsi 2019, pley-off 2020-ci ildə baş tutacaq.
Qrup mərhələsi
I tur – 6-8 sentyabr 2018
II tur – 9-11 sentyabr 2018
III tur – 11-13 oktyabr 2018
IV tur – 14-16 oktyabr 2018
V tur – 15-17 noyabr 2018
VI tur – 18-20 noyabr 2018
Final mərhələsinin püşkü – dekabr 2018
Final mərhələsi – 5-9 iyun 2019
Pley-offun püşkü – 22 noyabr 2019
Pley-off – 26-31 mart 2020
1news.az
