MFL League of Nations 2018: ABŞ vahid liderliyə yüksəldi, B Konferensiyasında ikihakimiyyətlilikdir
Azərbaycanın ən böyük həvəskar liqası olan MFL-in League of Nations 2018 adlı yeni superturnirində liderlik uğrunda mübarizə qızışır.
1news.az xəbər verir ki, keçən bazar 3-cü turun oyunları keçirildi. Əgər ilk iki turdan sonra yeni turnirin hələ cizgiləri cızılırdısa və komandalar bir-birilərini tanıyırdılarsa, üçüncü turdan sonra MFL League of Nations 2018-in dəqiq təsviri formalaşmağa başladı.
Elə ilk oyunlardan bəzi komandalar öz yüksək ambisiyalarını ortaya qoymaqla nümayiş etdirdilər ki, diplomatik nümayəndəliklərin dostluq turnirində heç də olimpiya prinsiplərinə əməl etmək fikrində deyillər. Yalnız iştirak deyil, qələbə vacibdir.
Hesabat turunda A Konferensiyasının mərkəzi qarşıdurması baş verdi. İki lider və favorit komanda – ABŞ-la Əlcəzair üz-üzə gəldi. Gözlənildiyi kimi, oyun gərgin mübarizə şəraitində keçdi. Nəticədə rəqibini 6:3 hesabı ilə məğlub edən ABŞ komandası qələbəni bayram etdi.
Bu qələbə sayəsində ABŞ komandası A Konferensiyasının vahid liderinə çevrildi. Əlcəzair və BMT-nin komandaları isə hərəyə 6 xala sahibdirlər. Lakin vurulan və buraxılan qolların ən yaxşı fərqinə görə Əlcəzair ikinci sıranı tutur.
B Konferensiyasında isə ikitirəlikdir. Sudan və Türkmənistan komandaları hələ turnir başlamamışdan qabaq favorit hesab edilirdilər və hələ ki, onlar bu statuslarını tam doğruldurlar. Üçüncü turda da hər iki komanda növbəti qələbəsini qazandı.
Sudan vurulan və buraxılan qolların ən yaxşı fərqinə görə B Konferensiyasına başçılıq edir. Lakin hər turdan sonra vəziyyət dəyişə bilər. 5-ci turda isə komandalar öz aralarında oynayacaqlar.
Sudanın məhsuldarlığı bombardirlərin yarışında da öz əksini tapdı. Məhz bu komandanın futbolçusu Məhəmməd MFL League of Nations 2018-də “snayperlərin” yarışına başçılıq edir.
Ən yaxşı assistentlərin yarışında isə A Konferensiyasının nümayəndələri üstünlük təşkil edirlər.
Növbəti turun oyunları fevralın 25-də keçiriləcək. MFL League of Nations 2018 müxtəlif ölkələrin Azərbaycandakı diplomatik nümayəndəliklərində çalışan futbol həvəskarlarını birləşdirən yeni turnirdir.
MFL League of Nations 2018-də 12 səfirliyin, eləcə də BMT-nin komandası iştirak edir. Komandalar iki Konferensiyaya bölünüblər. Hər iki konferensiyadan dörd ən yaxşı komanda pley-off-a vəsiqə qazanacaq ki, onlar da öz aralarında çempionu müəyyən edəcəklər.
Teymur Maksutov
