“Barselona” “Çelsi”ni darmadağın elədi, “Beşiktaş” yenə uduzdu – VİDEO

Çempionlar Liqasında (ÇL) 1/8 finalın sonuncu cavab matçları oynanılıb. 

1news.az-ın məlumatına görə, İstanbulda “Beşiktaş” ilk oyunda 0:5 hesabı ilə uduzduğu “Bavariya”nı qonaq edib. Formal xarakter daşıyan görüşdə yenə almanlar qalib gəliblər.

Bununla da iki oyunun nəticəsində qapısında 8 top görən və bu toplardan yalnız birinə cavab verən “Beşiktaş” Çempionlar Liqasında mübarizəni dayandırıb, “Bavariya” isə gözlənildiyi kimi, adını növbəti mərhələyə yazdırıb. 

Günün ən çox maraqla gözlənilən görüşü İspaniyada baş tutub. “Barselona” doğma arenada “Çelsi” ilə üz-üzə gəlib. Komandalar arasında Londonda keçirilən ilk qarşılaşma bərabərliklə başa çatdığından katalonların qalib gəlmək şansı daha yüksək qiymətləndirilirdi.

Bu ehtimal özünü doğrultdu. Oyunun 3-cü dəqiqəsində hesabı açan “Barselona” daha iki qol vuraraq darmadağını rəsmiləşdirib. Nəticədə “Bavariya” ilə yanaşı, “Barselona” da adını növbəti mərhələyə yazdırıb. 

Beləliklə, ÇL-in 1/4 finalında İspaniyanın 3 (“Real”, “Sevilya”, “Barselona”), İngiltərə (“Liverpul”, “Mançester Siti”) və İtaliyanın (“Yuventus”, “Roma”) hərəyə 2, Almaniyanın isə 1 klubu (“Bavariya”) mübarizə aparacaq. 

Çempionlar Liqası

1/8 final (cavab oyunları)

14 mart

“Beşiktaş” (Türkiyə) – “Bavariya” (Almaniya) - 1:3

Qollar: Vaqner Lav, 59 - Tiaqo, 18; Gökhan Gönül, 46 (avtoqol); Vaqner, 84

Baş hakim: Maykl Oliver (İngiltərə)

İstanbul, “Vodafone Park” stadionu

İlk oyun – 0:5

“Barselona” (İspaniya) – “Çelsi” (İngiltərə) - 3:0

Qollar: Messi, 3, 64; Dembele, 20

Baş hakim: Damir Skomina (Sloveniya)

Barselona, “Nou Kamp” stadionu

İlk oyun – 1:1

1news.az