#MFL Stars: “Poseidon” və qalib gəlmək üçün tükənməz iradə - FOTO - VİDEO
Azərbaycanın ən böyük həvəskar futbol liqası olan MFL-də ən müxtəlif komandalar cəmləşib.
Onlar biri-birindən yalnız turnirdə uğurlu çıxış dərəcəsi ilə deyil, həm də oyun tərzi, matçlara hazırlıq, xarakter və əhval-ruhiyyəyə görə də fərqlənirlər. Çempionatın ən iradəli komandalarından biri də heç şübhəsiz #MFL Stars-ın daimi rubrikasının qonağı olan “Poseidon”dur.
Qədim yunan mifologiyasından dənizlər hökmdarının adını daşıyan komandanın belə adlandırılması heç də təsadüfi deyil. Komandanın sponsoru ən innovativ Avropa avadanlıqlarından istifadə edərək minerallaşdırılmış yüksək keyfiyyətli su istehsal edən “H2O Silver Water” şirkətidir.
Hazırda “Poseidon” komandası B Konferensiyasında turnir cədvəlinin 4-cü sırasında qərarlaşıb və uşaqlar hər oyunda maksimum güc sərf edirlər. Komandanın əsas oyunçularından olan Ziya Mirzəcanovla söhbət zamanı komandada belə tükənməz gücün, enerjinin haradan qaynaqlandığı məlum oldu.
“MFL kimi turnirlərdə iştirak etmək üçün komandaya təcrübəli oyunçuları cəlb etmək lazımdır. Kapitanla birgə müxtəlif yerlərdən artıq MFL-də və yaxud peşəkar çempionatlarda oynamış təcrübəli futbolçuları komandaya cəlb etməyə başladıq. Komandanı yığandan sonra söz verdik ki, bütün oyunlara sonuncu oyunumuzmuş kimi çıxacağıq. Bir çox oyunlarımızı əzmkarlıq nümayiş etdirərək udmuşuq. İkinci hissədə tez-tez oyunumuzda yaxşılığa doğru dəyişiklik baş verir.
“H2O Silver Water” şirkəti MFL-də çıxış etməyimizin əsas səbəbkarı olmaqla yanaşı, bizə hərtərəfli dəstək verir. Rəqib komandalardan “Beerbaşa”nı qeyd edə bilərəm. Onlar bir neçə yaxşı transfer etdilər və hazırda bunun sayəsində zirvədədirlər. Fürsətdən istifadə edərək bütün komandalardan xahiş etmək istəyirəm ki, kobud oyundan imtina etsinlər və layiqli mübarizə aparsınlar”- deyə, Ziya qeyd edir.
Daha ətraflı – bizim videoreportajda:
1news.az
