Futbol

“Qəbələ” ilə “Keşlə”dən uğursuz start, “Neftçi”dən əzmkar qələbə - VİDEO

10:08 - 13 / 07 / 2018

Azərbaycanı Avropa Liqasında təmsil edən klublarımız dünən ilk matçlarına çıxıblar.

1news.az-ın məlumatına görə, “Qəbələ” ilə “Neftçi” evdə, “Keşlə” isə səfərdə meydana çıxıblar.

“Qəbələ” I təsnifat mərhələsində Lüksemburqun “Proqres” klubunu qəbul edib. Sənan Qurbanovun baş məşqçi kimi ilk rəsmi matçına çıxardığı “qırmızı-qaraların” görüşdə qalib gələcəyi gözlənilsə də, sevinən tərəf qonaq komanda olub.

İkinci hissədə komandamızın qapısına 2 cavabsız qol vuran “Proqres” evə sərfəli nəticə ilə dönüb. “Qəbələ” isə cavab matçı öncəsi işini çətinə salıb.

Avropa Liqası

I təsnifat mərhələsi, ilk oyun

12 iyul

20:00. “Qəbələ” (Azərbaycan) – “Proqres” (Lüksemburq) - 0:2

Qollar: Mayron de Almeyda, 51; Olivye Till, 61 (pen.)

Sarı vərəqələr: Jozef Monroz, 15; Təmkin Xəlilzadə, 84 - Sebastyan Till, 65; Sebastyan Floss, 72

Hakimlər: Vyaçeslav Banari, Vasile Ermişin, Dumitru Çiobanu, Andrey Kojokaru (hamısı Moldova)

Hakim-inspektor: İqor Pristovnik (Xorvatiya)

UEFA nümayəndəsi: Nikoloz Jqarkava (Gürcüstan)

Qəbələ. Şəhər stadionu

Azərbaycan kubokunun son qalibi olan “Keşlə” səfərdə Maltanın “Baltsan” klubunun qonağı olub. Bu, eyni zamanda “Keşlə”nin hazırkı adı altında ilk avrokubok sınağı olub. Yuri Maksimovun yetirmələri rəqibi qarşısında zəif oyun sərgiləyərək səfərdən 1:4 hesablı məğlubiyyətlə dönüblər.

“Baltsan” (Malta) – “Keşlə” (Azərbaycan) - 4:1

Qollar: Alfred Effionq, 12; Lekao, 21; Boyan Kalyeviç, 34; Kadu, 55 - Sezar Meza Kolli, 29 (pen.)

Sarı vərəqə: Miloş Lepoviç, 58; Kadu, 71 - Fuad Bayramov, 38; Ebrima Sonha, 88

Hakimlər: Volen Çinkov, Georgi Doynov, Deniz Sokolov, Draqomir Draqanov (hamısı Bolqarıstan)

Hakim-inspektor: Pyetur Siqurdsson (İslandiya)

UEFA nümayəndəsi: Pol Lion (Cəbəllütariq)

Ta Qali. "Sentenari" stadion

“Qəbələ” ilə “Keşlə”dən fərqli olaraq “Neftçi” ilk matçını evdə keçirib. “Ağ-qaralar” “Dalğa Arena”da Macarıstanın “Uypeşt” klubunu qonaq ediblər. Bu görüş həm də Roberto Bordinin “Neftçi”nin baş məşqçisi postunda debütü ilə yadda qalıb.

Qapısından erkən qol buraxan “Neftçi” bunun əvəzini 3 topla çıxaraq, əzmkar qələbə qazanıb.

“Neftçi” (Azərbaycan) – “Uypeşt” (Macarıstan) - 3:1

Qollar: Baqali Dabo, 24, 72; Emin Mahmudov, 90+2 - Daniel Nad, 9

Sarı vərəqələr: Baqali Dabo, 62; Emin Mahmudov, 66 - Robert Litauski, 78

Hakimlər: Dennis Yohan Hiqler, Yoost van Zuilen, Yohan Balder, Siemen Mulder (hamısı Hollandiya)

Hakim-inspektor: Stavros Tritsonis (Yunanıstan)

UEFA nümayəndəsi: İvan Tsitoviç (Rusiya)

Bakı. “Dalğa Arena”