Şəhriyar Məmmədyarov şikayətləndi: Bütün turnirlərə öz hesabımla gedirəm, sponsorum yoxdur

ABŞ-ın Sent-Luis şəhərində “Sinquefield Cup” turnirində mübarizə aparan Azərbaycanın ən güclü şahmatçısı Şəhriyar Məmmədyarov sosial şəbəkədəki paylaşımında sponsorunun olmamasından şikayətlənib.

1news.az xəbər verir ki, Maqnus Karlsenlə qarşılaşmasından sonra Şəhriyar Məmmədyarov  bunları yazıb:

“Yorğunluqdan indicə yuxudan durdum. Burada gecə saat 01:47-dir. Bu gün Karlsenlə 5 saatdan çox oynadım və açığı çox çətin mübarizə oldu. Debütdən böyük üstünlüyüm var idi. Sonra bir az pis vəziyyət aldım və rəqib 5 saat udmağa çalışdı. Və qərara gəldim ki, bundan sonra 40-45 günlük turnirlərə son qoyacam. Gərək az oynayıb, özümdə güc saxlayım. Bu qədər arxa-arxaya oynamaq əlbəttə ki, biabırçılıqdır. Bu gün bir jurnalist mənə sual verdi ki, səni bu qədər oynamağa məcbur edən nədir? Utandım deyim ki, pul. Deyə bilmədim ki, mənim kimi peşəkar oyunçunun sponsoru yoxdur. Və hətta bütün yarışlara öz hesabıma gəlirəm. Çünki burdakı bütün idmançıların sponsoru var. Amma sabah yenə də oyunum var və gərək hazırlaşım. Arada düşünürəm ki, bu ölkədə məndən güclü nə qədər idmançı var ki, bir sponsor tapılmır? Azərbaycana sevgim sonsuzdur. Amma heyif ki, mənim gücüm sonsuz deyil. Bir gün mən o Şəhriyar Məmmədyarov olmayacam. Onda isə bu söhbətlər mənasız olacaq”.

1news.az