Paşinyan Lukaşenkonun bəyanatı barədə
Belarus prezidenti Aleksandr Lukaşenko yalnız öz dediklərini təqdim edib, mənim cavabım barədə danışmayıb.
1news.az erməni mətbuatına istinadla xəbər verir ki, bunu Ermənistanın baş naziri vəzifəsini icra edən Nikol Paşinyan deyib.
"Məndən söhbətin detallarını açıqlamağı xahiş edən zaman dedim ki, qapalı görüş barədə detalları təqdim etməyi doğru hesab etmirəm. İndi də bu söhbətin tərəfimdən davam etdirilməsinə ehtiyac görmürəm".
Paşinyanın Rusiyanı prezidentini tənqid etmək üçün cəsarətinin olmamasına dair Lukaşenkonun ittihamına gəlincə, erməni baş nazir deyib ki, mətbuat katibi Rusiya rəhbəri ilə təmaslarda bu məsələnin mütəmadi olaraq qaldırdığını açıqlayıb:
"Sizi əmin edirəm ki, Lukaşenko tərəfindən səsləndirilən bütün məsələlərə yerindəcə dəqiq, konkret cavablar verilib. Düzünə qalsa, məndə Belarus prezidentinin cavablarımdan məmnun qaldığı təəssüratı yarandı. Və sonra nə baş verib, bilmirəm".
Qeyd edək ki, MDB sammitində A.Lukaşenko Azərbaycana silah satışı ilə bağlı İrəvanın Minskin ünvanına səsləndirdiyi tənqidlərə cavab verib. O, bununla bağlı Nikol Paşinyanla söhbətinin təfərrüatlarını açıqlayıb:
"İlham Əliyevin də iştirak etdiyi MDB sammiti çərçivəsində Putinin yanında ona (Paşinyan - red.) dedim: "Nikol, gəl məsələyə nöqtə qoyaq. Azərbaycana silah satışında ilk yeri hansı ölkə tutur? Rusiya. Hə, nə oldu, dilini uddun? Buyur, Vladimir Vladimiroviçi tənqid elə. Hə, nədir, qorxursan? Bu siyahıda Belarus - "Polonez"ləri nəzərə almaqla - 4 və ya 5-ci yeri tutur. "Polonez"lər yoxdursa, 10-cu olacağıq. Mənə hücum edirsən ki, başqaları anlasın? Sən de, mən susacağam". Söhbət belə oldu. Mən nədə haqsızam? İndi mən antierməni sayılıram? Bizdə ermənilər daha yaxşı yaşayır, nəinki Ermənistanda".
P.Sultanova
