Ermənistan XİN-də ciddi kadr dəyişiklikləri gözlənilir
Ermənistan Xarici İşlər Nazirliyində ciddi kadr dəyişiklikləri gözlənilir.
1news.az xəbər verir ki, bu barədə “Jamanak” nəşri yazıb.
Bildirilir ki, Ermənistanın Vatikandakı səfiri, üçüncü prezident Serj Sarkisyanın kürəkəni Mikayel Minasyanın əvəzinə xarici işlər nazirinin müavini Karen Nazaryan təyin olunacaq. Digər nazir müavini Aşot Hovakimyan da səfir təyin ediləcək, lakin hansı ölkəyə, bu barədə məlumat verilmir.
Erməni mətbuatı xarici işlər nazirinin müavini Şavarş Koçaryanın təqaüdə göndəriləcəyinə dair də məlumat yayıb. Onun nazirin müşaviri təyin ediləcəyi də istisna olunmur. Koçaryanı müavin vəzifəsində Ermənistanın İsveç və Finlandiyadakı səfiri Artak Apitonyan əvəz edəcək.
"Xarici İşlər Nazirliyinin strukturunda böyük dəyişikliklər gözlənilir, nazir müavini Armen Papikyan Avstraliyaya səfir göndəriləcək, Karen Nazaryan və Aşot Hovakimyan təyinat gözləyir, Ruben Rubenyan isə parlamentə göndəriləcək”, deyə qəzet yazır.
P.Sultanova
